ශාස්ත්‍රවේදී දෙබත්ගම සෝමරතන තිස්ස නායක ස්වාමීන්වහන්සේ වෙත ශ්‍රි ඉන්දජෝති වංශාවලංකාර ශ්‍රී රතනජෝති වංශාවතංස ගෞරව නාමය සහිත ශ්‍රී ලංකා අමරපුර මහා නිකායේ මූලවංශික පාර්ශවයේ අනුනායක ධුරය සඳහා වන සන්නස් පත්‍රය පිරිණැමීම මාර්තු 02 දින පස්වරුවේ අරණායක දෙබත්ගම ශ්‍රී රතනජෝත්‍යාරාම ධර්ම මන්දිරයේදී සිදු කෙරිණ.
අනුනායක ස්වාමීන් වහන්සේ වෙනුවෙන් රචිත ආශිංසන ග්‍රන්ථ පිරිණැමීම සම්පාදක ස්වාමීවහන්සේලා විසින් සිදු කළහ. අනතුරුව අනුනායක පදවිය වෙනුවෙන් වූ සන්නස් පත්‍රය පිරිණැමීම අග්‍රාමාත්‍ය ආචාර්ය හරිනි අමරසූරිය විසින් සිදු කළාය.
විජිනිපත පිළිගැන්වීම පරිසර අමාත්‍ය වෛද්‍ය ධම්මික පටබැඳි විසින් සිදු කළ අතර ප්‍රසාද පූජා පැවැත්වීම පාර්ලිමේන්තු මන්ත්‍රී නන්ද බණ්ඩාර,නන්දන මිල්ලගල ඇතුළු මහජන නියෝජිතයින්, රාජ්‍ය නිලධාරීන් සහ දායක සභාවේ සාමාජිකයින් විසින් සිදු කළේය.
බුදු දහමෙි චිරස්ථිතිය වෙනුවෙන් දෙබත්ගම සෝමරතන තිස්ස නායක හිමියන් විසින් සිදු කළ මෙහෙය ඇගයීමට ළක් කළ අග්‍රාමාත්‍යතුමිය ඉදිරි ශාසනික මෙහෙවර වෙනුවෙන් ශුභාශිංසන මෙහිදී පිරිණැමීය.
අමරපුර මූලවංශික පාර්ශවයේ මහා නායක අහුංගල්ලේ විමලධම්ම තිස්ස නාහිමියන් ප්‍රධාන මහාසංඝරත්නය, මහජන නියෝජිතයින්, රාජ්‍ය නිලධාරීන් ඇතුළු දායක දායිකාවන් විශාල පිරිසක් මෙම අවස්ථාවට සහභාගී වූහ.
