රට පුරා සහල් හිඟයක් පවතින අවස්ථාවක අධික මිලකට සහල් මිලදී ගැනීමට ජනතාවට සිදුව තිබෙන බව හිටපු පාර්ලිමේන්තු මන්ත්‍රී විජේපාල හෙට්ටිආරච්චි මහතා අවධාරණය කරයි.
සමගි ජන බලවේගය ප්‍රධාන කාර්යාලයේ ඊයේ (22) පැවති මාධ්‍ය හමුවට සහභා වෙමින් හිටපු පාර්ලිමේන්තු මන්ත්‍රී විජේපාල හෙට්ටිආරච්චි මහතා මේ බව කියා සිටියේය.
එහිදී වැඩිදුරටත් අදහස් දැක්වූ හෙතෙම මෙසේ ද පැවසීය.
ජාතික ජන බලවේග ආණ්ඩුව බලය ලබාගෙන මේ වනවිට මාස හතරක පමණ කාලයක් ගෙවී ගොස් තිබෙනවා. නමුත් මැතිවරණ වේදිකාවල දී ජාතික ජන බලවේගය ජනතාවට ලබා දෙනවා යැයි පොරොන්දු වූ දේවල් ඉටු කරන්න අමතක වී ගොස් තිබෙනවා.
ඇතැම් ප්‍රශ්න පිළිබඳව එක පෑන් පහරකින්, පැය 24න් පැය 48න් විසඳුම් ලබා දෙන බව ජාතික ජන බලවේගයේ පිරිස් මැතිවරණ වේදිකාවල දී ප්‍රකාශ කළා.
නමුත් රටේ ජනතාවට සහන ලබා දෙන්න, ජීවන වියදම අවම කරන්න රජය කිසිදු පියවරක් ගෙන නැහැ. රටේ ජනතාවගේ ජීවන වියදම අවම කිරීමට ජනාධිපතිවරයාට වගකීමක් තිබෙනවා. විශේෂයෙන්ම ජනාධිපතිවරයා බලයට පත් වුණාට පසුව රටේ ජනතාවගේ ප්‍රධාන ආහාරය වන සහල් හිඟයකින් තොරව ලබාදීමට වැඩපිළිවෙළක් සකස් කරන්න තිබුණා. නමුත් ඒ ආකාරයට නිසි වැඩපිළිවෙළක් ක්‍රියාත්මක කර ගන්න ජනාධිපතිවරයාට සහ රජයට හැකියාවක් ලැබුණේ නැහැ. ඒ නිසා අද වනවිට සහල් හිඟයක් සහ අධික මිලකට ජනතාවට සහල් කිලෝවක් මිලදී ගැනීමට සිදු වී තිබෙනවා. ඒ වගේම රටේ ජනතාවට බලපාපු ප්‍රධාන ගැටලු කිහිපයක් තිබුණා.අධික විදුලි බිල, අධික ඉන්ධන මිල, ජල බිල, ගෑස් මිල අධික වීම නිසා රටේ ජනතාව දැඩි අපහසුතාවට පත් වී සිටිනවා. රජය එක රුපියලකින්වත් ජනතාවගේ ආදායම් තත්ත්වය වැඩි කරන්න වැඩපිළිවෙළක් සකස් කළේ නැහැ. ආණ්ඩුව ජනතාවගේ අපේක්ෂාවන් බිඳ දමමින් කටයුතු කරන ආකාරයක් තමයි පෙනෙන්නට තිබෙන්නේ.
ඒ වගේම පසුගිය කාලයේ දී චීනය සහ ශ්‍රී ලංකාව අතර ඇති කරගත් එකඟතා දැඩි විවේචනයට ලක් කරන්න ජාතික ජන බලවේගය කටයුතු කළා. නමුත් පසුගිය ආණ්ඩු චීනය සමඟ ඇති කරගත් එකඟතා ක්‍රියාත්මක කරන්න වර්තමාන රජය කටයුතු කරමින් සිටිනවා. රටේ අනන්‍යතාව ආරක්ෂා කර ගැනීම සඳහා ආණ්ඩුවට නිවැරැදි ප්‍රතිපත්තියක් සහ වැඩපිළිවෙළක් නොමැති බව මෙයින් පෙනීයනවා.
හොරුන්ට සහ දූෂිතයන්ට දඬුවම් ලබා දෙනවා කියලා ආණ්ඩුව මැතිවරණ වේදිකාවල දී ප්‍රකාශ කළා. පාතාලය, කුඩු සංස්කෘතිය රටෙන් තුරන් කරන බව ඔවුන් එදා ප්‍රකාශ කළා. ඒ සඳහා අවශ්‍ය නීතිමය වැඩපිළිවෙළ සකස් කර තිබෙන බවත් ආණ්ඩුව ප්‍රකාශ කළා.
මනුෂ්‍ය ඝාතන සිදුවීම් අවම කරන බවත් ඔවුන් ප්‍රකාශ කළා. නමුත් ඇප නියම වී අධිකරණයෙන් එළියට පැමිණෙන මහා පරිමාණ මත්ද්‍රව්‍ය ජාවාරම්කරුවන් පහසුවෙන්ම රටින් පිට වී ගොස් තිබෙනවා. ඒ වගේම මනුෂ්‍ය ඝාතනවලට සම්බන්ධ පිරිස් නිදැල්ලේ සිටිනවා.”
