අකීකරු කළු අහස වැසි බිමට හෙළනවා
හිතක් පපුවක් නැතිව කඳු කඩා වැටෙනවා
වියරු වුණු ජල කඳට ගම් බිම්ද නැසෙනවා
දුක් කඳුළු මැදි කරන් ගංවතුර ගලනවා
දිවයිනට බලපා ඇති අයහපත් කාලගුණික තත්ත්වය හමුවේ දිස්ත්‍රික්ක ගණනාවකම ජන ජීවිතය අඩාළ වී තිබේ. මහනුවර, නුවරඑළිය, බදුල්ල, අනුරාධපුරය, පොලොන්නරුව, මඩකළපුව, යාපනය, වව්නියාව, කිළිනොච්චිය, මුලතිව්, මන්නාරම, පුත්තලම, ත්‍රිකුණාමලය, කළුතර, කොළඹ, අම්පාර, ගාල්ල, මාතර, රත්නපුරය, කෑගල්ල, මාතලේ යන දිස්ත්‍රික්කවල ගස් කඩා වැටීම්, පස් කඳු කඩා වැටීම්, ගිලා බැසීම් ඇතුළු ආපදා රැසක් වාර්තා වෙමින් පවතී. විපත්වලින් පීඩාවට පත්වූවන් ආරක්ෂිත ස්ථානවලට යොමු කර ඇති අතර, ඔවුන්ට අවශ්‍ය පිසූ ආහාර ලබාදීම සඳහා ඒ ඒ ප්‍රාදේශීය ලේකම් කොට්ඨාසවල ප්‍රාදේශීය ලේකම්වරුන් මෙන්ම ආපදා සහන සේවා නිලධාරීන් මේ වන විටත් ක්‍රියාත්මක වී ඇති බවද වාර්තා වෙයි. එමෙන්ම ආපදාවට ලක්වූ ප්‍රදේශවල සහන සේවා කටයුතු සඳහා ශ්‍රී ලංකා යුද හමුදාව, නාවික හමුදාව, ගුවන් හමුදාව, සිවිල් ආරක්ෂක බළකාය මෙන්ම ශ්‍රී ලංකා පොලීසියද එක්ව කටයුතු කරමින් සිටියි. මෙම ආපදා තත්ත්වයෙන් දිවයින වටා මුහුදු ආශ්‍රිතව කර්මාන්තයේ නිරත ධීවරයින් ධීවර කටයුතුවලින් ඈත්ව සිටින බවද වාර්තා වෙයි. මෙම අයහපත් කාලගුණික තත්ත්වය හමුවේ මහවැලි, කැලණි, නිල්වලා, ගිං, වලවේ, කළුගඟ ඇතුළු ගංගාවන් මෙන්ම පරාක්‍ර‍ම සමුද්‍ර‍ය, දැදුරුඔය, කලාවැව, නෝටන්බ්‍රිජ්, විමලසුරේන්ද්‍ර ජලාශය, ඉහළ කොත්මලේ ජලාශය යනාදී ජල මූලාශ්‍ර පිරී ඉතිරී යෑමෙන් රටම පීඩාවට පත්ව තිබුණේ මේ අයුරිනි.
