ඉන්දීය ධීවරයන් මෙරට මුහුදු තීරය ආක්‍රමණය කිරීම නැවැත්වීමට අවශ්‍ය සියලු පියවර ගන්නා බව ධීවර,ජලජ හා සාගර සම්පත් ඇමැති රාමලිංගම් චන්ද්‍රසේකර් මහතා පැවසීය. ධීවර අමාත්‍යාංශ ඇතුළු පාර්ශ්වයන් ඒ සඳහා මෙතෙක් ගෙන ඇති ක්‍රියාමාර්ග මෙන්ම තවත් පියවර රැසක් ඉදිරියටත් ක්‍රියාත්මක කරන බවද ඇමැතිවරයා කීය.
මේ රටේ ඉතා වැදගත් ක්ෂේත්‍රයක් වන ධීවර ක්ෂේත්‍රයෙන් රට සංවර්ධනය කිරීමට ධීවර අමාත්‍යාංශ නිලධාරින්,සේවක සේවිකාවන් මෙන්ම ධීවර ප්‍රජාවද එකට එක්වී කැපවීමෙන් ක්‍රියා කළ යුතු බව ද ඇමැතිවරයා අවධාරණය කළේය.
කොළඹ,මාලිගාවත්ත පිහිටි ධීවර අමාත්‍යාංශයේදී පෙරේදා (19)සිය ඇමැති ධුරයේ රාජකාරි අරඹමින් ඇමැතිවරයා මේ බැව් ප්‍රකාශ කළේය.
එහිදී වැඩිදුරටත් ඇමැතිවරයා මෙසේද කීය.
මම ධීවරයන් ගැන උතුරේදී කතා කළාට,ධීවරයන් වෙනුවෙන් වැඩ කළාට ධීවර අමාත්‍යාංශයට පය තැබුවේ අද පළමුවරටයි. ඒ ධීවර ඇමැතිවරයා විදිහටයි. එය මට මහත් ආඩම්බරයක්. මේ රටේ ජනතාව අප විශ්වාස කර මේ රටේ පාලන බලය අපට දී තිබෙනවා. එය ඉතිහාසයේ කිසිම පාලනයකට නොදුන් සුවිශාල ජනවරමක්. උතුරේ මෙන්ම කඳුකරයේ මෙතෙක් හොල්ලන්න බැරිව තිබූ තැන් සුද්ධ කර මුළු රටම අපට භාරදී තිබෙනවා. ජාතිවාදය මාකට් කිරීම දැන් ජනතාවගෙන් ප්‍රතික්ෂේප වෙලා. මෙහිදී ජනතාවගේ අභිලාෂය වූයේ වංචාවෙන් දූෂණයෙන් තොර වූ රටක් බිහි කිරීමයි. ඒ සඳහා උපරිම වශයෙන් කැපවී කටයුතු කරන බවට අප ජනතාවට පොරොන්දු වෙනවා. ජනතාවට හොඳ ජීවන තත්ත්වයක් ලබා දීමයි අපේ ප්‍රතිපත්තිය.
රට වටේ තිබෙන මුහුදෙන් අප නිසි ප්‍රයෝජන ගත්තා ද කියන ප්‍රශ්නාර්ථය දැන් අපට ඉතිරි වී තිබෙනවා. ධීවර ජනතාවට අප දන්වා සිටින්නේ මේ ඔබේ අමාත්‍යාංශය,එය රැකගෙන ඉදිරියට ගෙන යා යුතු වන්නේ ඔබමයි. මේ සඳහා ධීවර අමාත්‍යාංශයේ හොඳ දක්ෂ නිලධාරින් පිරිසක් සිටිනවා. අප සියලු දෙනා එකතු වී ධීවර ක්ෂේත්‍රය දියුණු කරමු. මේ අමාත්‍යාංශයේ නිලධාරින්ට, සේවක සේවිකාවන්ට පසුගිය කාලයේ තම සේවා කරගෙන යෑමේදී ගැටලු ඇති වන්න ඇති,විවිධ බාධා තිබෙන්න ඇති. ඒවා ඉදිරියට නොවන්න නිදහසේ රාජකාරි කරගෙන යන්න මා අවශ්‍ය මාර්ග විවෘත කර දෙනවා. නමුත් ඒ නිදහසින් අයුතු ප්‍රයෝජන නොගැනීමට සියලුදෙනා වගබලා ගත යුතුයි.
ප්‍රවාහන,මහාමාර්ග,වරාය සහ සිවිල් ගුවන්සේවා ඇමැති බිමල් රත්නායක මහතා සහ ධීවර අමාත්‍යාංශයේ උසස් නිලධාරීහු පිරිසක් මේ අවස්ථාවට එක්වූහ.
