ඉන්දියාව, නේපාලය සහ බංග්ලාදේශය අතර ත්‍රෛපාර්ශ්වික ගිවිසුමට අනුව නේපාලය අතර පවතින ජල සම්පත් සහ බලශක්ති සහයෝගිතාව කඩිනම් කිරීමට සහ බංග්ලාදේශයට මෙගාවොට් 40ක විදුලි අපනයනයක් සිදු කිරීමට ඉන්දියාවේ අවධානය යොමු වී ඇතැයි විදෙස් මාධ්‍ය වාර්තා කළේය. ඉන්දීය රජයේ අවධානය යොමු වී ඇත්තේ පසුගියදා ඉන්දියාවේ සංචාරය කළ නේපාල බලශක්ති හා ජල සම්පත් ඇමැති දීපාක් කඩ්කා සහ ඉන්දියාවේ විදුලිබල ඇමැති මනෝහර් ලාල් කට්ටර් සහ ජල සම්පත් ඇමැති සී.ආර්. පටිල් අතර මේ පිළිබඳ පැවැති සාකච්ඡාවෙන් පසුව බවද විදෙස් මාධ්‍ය වැඩිදුරටත් වාර්තා කළේය.
එම සාකච්ඡාව සාර්ථක හා ඵලදායි ලෙස හඳුන්වමින් නේපාලයේ බලශක්ති හා ජල සම්පත් ඇමැතිවරයා මාධ්‍යයට ප්‍රකාශ කර ඇත්තේ රටවල් ත්‍රිත්වය අතර බලශක්ති හා ජල සම්පත් සහයෝගිතාව ඉදිරියට ගෙන යෑමට ඉන්දීය රජයේ එකඟතාව පළ වී ඇති බවය. නේපාලයේ කඳුකර පළාත්වල ජීවත්වන ජනතාවට සූර්ය පැනල සවි කිරීම හරහා මෙන්ම පානීය ජලය සැපයීම පහසු කිරීමට අවශ්‍ය යටිතල පහසුකම් ලබා දීමට නේපාල රජය ඉන්දියාවෙන් ඉල්ලීමක් කළ බවත්, නේපාලය විසින් ඉදිරිපත් කරනු ලැබූ ඉල්ලීමට ඉන්දීය රජයේ ධනාත්මක ප්‍රතිචාර ලැබී ඇති බවත් විදෙස් මාධ්‍ය සඳහන් කළේය.
