හිටපු රාජ්‍ය අමාත්‍ය ලොහාන් රත්වත්තේ සහ ඔහුගේ බිරිඳ මේ වන විට නුගේගොඩ මහේස්ත්‍රාත් අධිකරණයට රැගෙනවිත් තිබෙයි
නීති විරෝධි ලෙස විදේශයකින් මෙරටට ගෙන්වා එකලස් කරන ලද මෝටර් රථයක් භාවිත කළ බවට වන චෝදනාවට අදාළව මෙලෙස අධිකරණයට ඉදිරිපත් කර ඇත.
මිරිහාන පොලිසියට ලැබී තිබු තොරතුරකට අනුව මිරිහාන ප්‍රදේශයේ නිවසක ගරාජයක තිබි අති සුඛෝපභෝගී මෝටර් රථයක් පසුගිය 26 වනදා පොලිසිය සොයා ගෙන තිබිණි.
අදාළ රථය තිබූ නිවස ලොහාන් රත්වත්තේ මහතාගේ බිරිඳට අයත් වූ එකක් බව හෙළි වී තිබෙයි.
පොලිස් භාරයට ගත් මෝටර් රථයේ එන්ජින් සහ චැසි අංක ඔස්සේ සිදුකළ විමර්ෂණවලදී එය මෙරට ලියාපදිංචි කළ රථයක් නොවන බවට තහවුරු වු බවයි පොලිසිය පැවසුවේය.
සිද්ධිය සම්බන්ධයෙන් ලොහාන් රත්වත්තේ මහතා පළමුව අත්අඩංගුවට ගැනුනු අතර ඔහු අද දිනය තෙක් රක්ෂිත බන්ධනාගාර ගත කිරීමටයි නුගේගොඩ මහේස්ත්‍රාත් අධිකරණය නියම කළේය.
සිද්ධිය සම්බන්ධයෙන් ඔහුගේ බිරිඳ ද පසුව අත්අඩංගුවට ගැනුණි.
මේ අනුව ලොහාන් රත්වත්තේ සහ ඔහුගේ බිරිඳ යන දෙදෙනාම බන්ධනාගාර බස් රථයකින් අද දින අධිකරණයට රැගෙන ඒමටයි කටයුතු කර තිබිණි.
