ඉදිරි පාර්ලිමේන්තු මැතිවරණයේදී ලියාපදිංචි මුළු ඡන්දදායක ප්‍රමාණය වූ එක්කෝටි හැත්තෑ එක්ලක්ෂ හතළිස්දහස් තුන්සිය පනස්හතර (1,71,40,354) සඳහා ඡන්ද මධ්‍යස්ථාන 13,421ක් පිහිටුවීමට මැතිවරණ කොමිසම තීරණය කර තිබේ.
ඒ අනුව වැඩිම ඡන්දදායකයන් පිරිසක් ලියාපදිංචිවී ඇති ගම්පහ දිස්ත්‍රික්කයේ ඡන්දදායකයන් 1,881,129 වෙනුවෙන් ඡන්ද මධ්‍යස්ථාන 1212 ක් පිහිටුවීමට නියමිතය. කොළඹ දිස්ත්‍රික්කයේ ඡන්දදායකයන් 1,765, 351 දෙනකු වෙනුවෙන් ඡන්ද මධ්‍යස්ථාන 1,204 ක් පිහිටුවන බව මැතිවරණ කොමිසම පැවසීය.
කළුතර දිස්ත්‍රික්කයේ ඡන්දදායකයින් 1, 024, 244 දෙනකු වෙනුවෙන් ඡන්ද මධ්‍යස්ථාන 735 ක් පිහිටුවන බව ද මැතිවරණ කොමිසම සඳහන් කළ අතර අඩුම ලියාපදිංචි ඡන්දදායකයින් සංඛ්‍යාව, එනම් ඡන්ද දායකයින් 91, 607 සහිත මන්නාරම දිස්ත්‍රික්කය සඳහා ඡන්ද මධ්‍යස්ථාන 108ක් පිහිටුන බව ද පැවසීය.
ඒ අනුව මෙවර මැතිවරණයේදී දිවයින පුරා ඡන්ද මධ්‍යස්ථාන 13, 421ක් පිහිටුවීමට මැතිවරණ කොමිසම පියවර ගෙන ඇති අතර ක්‍රියාත්මක ගණන් කිරීමේ මධ්‍යස්ථාන සංඛ්‍යාව 2,034ක් බව ද පැවසීය.
පාර්ලිමේන්තු මැතිවරණය සඳහා ඡන්දදායකයින් එක්කෝටි හැත්තෑ එක් ලක්ෂ හතළිස් දහස් තුන්සිය පනස් හතරක් සුදුසුකම් ලබා තිබේ.
