ප්‍රතිසංස්කරණ කටයුතු හේතුවෙන් මාස 10කට ආසන්න කාලසීමාවක් තාවකාලිකව නවතා තිබූ කොළඹ කොටුව සිට කන්කසන්තුරය දක්වා ගමන්ගත් යාල්දේවී මගී දුම්රිය, ඊයේ (28) සිට යළි ධාවනයට එක්කරනු ලැබීය.
දුම්රිය මගී ජනතාවට ප්‍රශස්ත,කාර්යක්ෂම සේවයක් ලබාදීම අරමුණු කරගනිමින්,ශ්‍රී ලංකා දුම්රිය සේවය පුනරුදයක් කරා ගෙනයන ගමනේ තවත් එක් පියවරක් වශයෙන් ආරම්භ කළ මහව -අනුරාධපුර දුම්රිය මාර්ගයේ නවීකරණ කටයුතු මේ වනවිට සාර්ථක අන්දමින් නිම කර තිබේ. මේ වසරේ ජනවාරි මස 07දා ආරම්භ කරන ලද මේ නවීකරණ කටයුතු, ඉන්දීය රජයේ ණය ආධාර මත, ප්‍රවාහන හා මහාමාර්ග අමාත්‍යාංශයේ අධීක්ෂණය යටතේ, ශ්‍රී ලංකා දුම්රිය දෙපාර්තමේන්තුව මගින් සිදුකරනු ලැබීය. දුම්රිය දෙපාර්තමේන්තුව පවසන අන්දමට, කි.මී. 68 ක්වන මේ මහව -අනුරාධපුර දුම්රිය මාර්ගය වසර 119කට පසු, එනම් වර්ෂ 1905 න් පසු මෙවර සම්පූර්ණ අලුත්වැඩියාවකට ලක්කර තිබේ.
මහව – අනුරාධපුරය අතර වූ මාර්ගයේ පාලම් 12ක් අඩි 40කට අඩු දිග ප්‍රමාණයේ පාලම් 25ක් හා බෝක්කු 26ක්ද මේ ව්‍යාපෘතිය යටතේ නවීකරණය වී තිබේ. එසේම රන්දෙණිගම, අඹන්පොළ, ගල්ගමුව, සෙනරත්ගම, තඹුත්තේගම, තලාව, ශ්‍රාවස්තිපුර යන දුම්රිය ස්ථාන නවීකරණය කර මගී ජනතාව වෙනුවෙන් විවේකාගාර හා යටිතල පහසුකම් රැසක් ස්ථාපනය කර තිබේ. සෑම දුම්රිය ස්ථානකටම පහසුකම් සහිත නව මගී වේදිකා, ආබාධිත මගීන් වෙනුවෙන් දුම්රිය ස්ථානයේ ගමන් කිරීමට විශේෂ පහසුකම් ආදිය ද සලසා තිබේ. එසේම විදුලි සංඥා පද්ධති ද නවීකරණය කර ස්ථාපිත කර තිබේ.
කි.මී. 128 ක් දිගැති මහව – ඕමන්ත සම්පූර්ණ දුම්රිය මාර්ග නවීකරණ ව්‍යාපෘතියේ අනුරාධපුර සිට ඕමන්ත දක්වා වූ මාර්ගය මේ වන විට අවසන් කර ඇත. නවීන තාක්ෂණික ක්‍රමවේද භාවිත කරමින් ඉදිවූ මේ දුම්රිය මාර්ග ව්‍යාපෘතියට ඇස්තමේන්තුගත මුදල අමෙරිකානු ඩොලර් මිලියන 91කි.
අද උදෑසන 5.45 පමණ කොළඹ කොටුව දුම්රිය ස්ථානයෙන් ගමන් ඇරඹූ යාල්දේවි දුම්රිය, නියමිත වේගසීමා යට‌ෙත් සාර්ථක අන්දමින් සිය ගමනාන්තය කරා ළඟා වී තිබේ. මෙසේ නැවතත් යාල්දේවි දුම්රිය ධාවනයට එක් කිරීම සම්බන්ධයෙන් දුම්රිය මගීහු සිය සතුට ප්‍රකාශ කර සිටියහ.
මේ දුම්රිය ධාවනය ආරම්භ කිරීමෙන් පසු දිනපතා උතුරු මංතීරුවේ දුම්රිය ධාවනය වන බැවින් ප්‍රවේශමෙන් දුම්රිය හරස් මාර්ග භාවිත කරන ලෙස දුම්රිය දෙපාර්තමේන්තුව ජනතාවගෙන් ඉල්ලා සිටියි.
