නීති විරෝධී අයුරින් මීට වසර 6කට පෙර මෙරටට ආනයනය කරන ලද සහල් බහලුම් 53ක් ඇතුළු භාවිතයට ගත නොහැකි විවිධ ආහාර ද්‍රව්‍ය, බෙහෙත් හා පොහොර ආදි ද්‍රව්‍ය බහාලුම් විශාල ප්‍රමාණයක් මේ වන විටත් රේගුවේ රඳවාගෙන ඇතැයි ජාතික විගණන කාර්යාලය නිකුත් කළ වාර්තාවක දැක්වේ.
මෙසේ ආනයනය කර ඇති සහල්වල වටිනාකම රුපියල් 18,60,58,922ක් වේ. මෙම සහල් බහාලුම් 53 මෙරටට ගෙන්වා මේ වන විටත් වසර 6ක කාලයක් ගතව ඇත. මිනිස් පරිභෝජනයට නුසුදුසු තත්ත්වයේ තිබෙන මෙම සහල් තොගය සත්ත්වය ආහාර සඳහා යොදා ගැනීමටද නොහැකි වී ඇත්තේ පාරිභෝගික සේවා අධිකාරිය මඟින් පළ කරන ලද ගැසට් පත්‍රයක් හේතුවෙන් බව විගණනයෙන් හෙළි වී තිබේ.
මීට අමතරව ඉකුත් වසර 12ක කාලයක් තුළ නීතිවිරෝධීව ගෙන්වනු ලැබූයෙන් පසු ශ්‍රී ලංකා රේගුව අත්අඩංගුවට ගත් වටිනාකම තහවුරු නොකළ විවිධ ආහාර ද්‍රව්‍ය, බෙහෙත් වර්ග සහ පොහොර ආදිය සහිත බහලුම් 39ක් ද, ඉකුත් වසර 5ක කාලයක් තුළ රඳවා ගත් විවිධ ද්‍රව්‍ය අඩංගු බහලුම් 448ක් ද, වසර 5ක කාලය තුළ රඳවා ගත් අන්තර්ගත ද්‍රව්‍ය ඇති හෝ නැති බව නොදන්නා බහාලුම් 116ක්ද, ඉකුත් වසර 10ක කාලයක් රඳවා ගත් බහාලුම් 38ක්ද වශයෙන් බහාලුම් 700කට ආසන්න ප්‍රමාණයක් රේගුවේ රඳවා ඇති බව එම විගණන වාර්තාවේ සඳහන් වෙයි.
