විදේශීය සංචාරකයන් සම්බන්ධයෙන් විශේෂ අනතුරු ඇඟවීම් රටවල් ගණනාවක් විසින් නිකුත් කර තිබුණ ද මෙරටට පැමිණෙන සංචාරකයන්ගෙන් සියයට 99ක්ම පැමිණෙන සීගිරිය සංචාරක ප්‍රදේශයට පෙරේදා (24) උදෑසන වන විටත් කිසිම විශේෂ ආරක්ෂක වැඩපිළිවෙළක් ක්‍රියාත්මක කර නැති බව සංචාරක මඟ පෙන්වන්නෝ පවසති.
මධ්‍යම සංස්කෘතික අරමුදලේ සීගිරි ව්‍යාපෘති කළමනාකාර තුසිත හේරත් මහතාගෙන් පෙරේදා (24) අප කළ විමසීමකදී හෙතෙම සඳහන් කළේ මෙතෙක් තමන්ට කිසිම ආයතනයකින්, ආරක්ෂක අංශයකින් ආරක්ෂාව තර කරන ආකාරයක් හෝ ආරක්ෂාවක් වැඩි කිරීමක් ගැන දැනුවත් කිරීමක් කර නැති බවයි. මධ්‍යම සංස්කෘතික අරමුදලේ ආරක්ෂක නිලධාරීන් සහ සීගිරිය සංචාරක පොලිසිය පුරුදු පරිදි ආරක්ෂක රාජකාරි ක්‍රියාත්මක කරන බව හෙතෙම පැවසීය.
කෙසේ වෙතත් පසුගියදා විදේශීය රටවල් රැසකින් අනතුරු ඇඟවීම් පිළිබඳව නිවේදන නිකුත් කර තිබුණද සීගිරිය නැරඹීමට පෙරේදා (24) උදෑසන අතිවිශාල විදේශීය සංචාරකයන් පිරිසක් සීගිරියට පැමිණ සිටින අයුරු දැක ගත හැකි විය. මධ්‍යම සංස්කෘතික අරමුදලේ ආරක්ෂක නිලධාරීන් මෙන්ම පිටතින් පැමිණි විදේශීය කණ්ඩායම් රැගෙන එන සංචාරක ආයතන නියෝජිතයන්ද කියා සිටියේ සීගිරියට විශේෂ ආරක්ෂාවක් මෙතෙක් ක්‍රියාත්මක වනු බවක් දැක ගැනීමට නොහැකි බවයි.
