අධික වර්ෂාව හේතුවෙන් ඉන්දියාවේ කර්නාටක ප්‍රාන්තයේ බෙංගලූරු නුවර ඉදි කරමින් තිබූ මහල් 7ක ගොඩනැඟිල්ලක් කඩා වැටීමෙන් පුද්ගලයන් 8 දෙනකු ජීවිතක්ෂයට පත්වී ඇතැයි විදෙස් මාධ්‍ය වාර්තා කළේය. ,ඒ මොහොතේ ගොඩනැඟිල්ලේ ඉදි කිරීම් කටයුතුවල නිතරව සිටි තවත් කම්කරුවන් 21 දෙනකු කඩා වැටුණු ගොඩනැඟිල්ලේ සුන්බුන්වල සිරවී සිටින බව විදෙස් මාධ්‍ය වැඩිදුරටත් වාර්තා කළේය.
පසුගිය අඟහරුවාදා පස්වරුවේ මේ අනතුර සිදුවී ඇති අතර, සුන්බුන්වලට යටවූ පිරිස සොයා එදින රාත්‍රිය මුළුල්ලේ මෙහෙයුම් කටයුතු සිදුවූ බව වාර්තා වේ. කම්කරුවන් 13 දෙනකු නිරුපද්‍රිතව මුදා ගැනීමට සමත්වූ බවත්, තුවාල ලැබු තවත් 6 දෙනකු රෝහල්ගත කළ බවත් මෙහෙයුම් භාර නිලධාරින් ප්‍රකාශ කර තිබේ.
මහල් 4කින් සමන්විත ගොඩනැඟිල්ලක් ඉදි කිරිමට අවසර දී තිබියදී මහල් 7ක් ඉදි කිරිමට කටයුතු කිරීම ගොඩනැඟිල්ල කඩා වැටීමට හේතුව බව බලධාරීන් ප්‍රකාශ කර ඇති අතර, අවිධිමත් ආකාරයෙන් එම ඉදි කිරීම් සිදු කිරීම නිසා මේ වනවිට එම ගොඩනැඟිල්ලේ හිමිකරු සහ ඉදි කිරිම් භාරව සිටි ඉංජිනේරුවරයා අත්අඩංගුවට ගෙන ඇතැයි ද විදෙස් මාධ්‍ය වැඩිදුරටත් වාර්තා කළේය.
