විස්සයි20 ජාත්‍යන්තර ක්‍රිකට් පිටියේ කණ්ඩායමක් ඉනිමකදී ඉහළම ලකුණු රැස් කිරීමේ ලෝක වාර්තාව තමන් සතු කර ගැනීමට සිම්බාබ්වේ ක්‍රීඩකයෝ ඊයේ සමත් වූහ.
විස්සයි20 ලෝක කුසලාන ක්‍රිකට් තරගාවලියට සුදුසුකම් ලබා ගැනීම වෙනුවෙන් පැවැත්වෙන අප්‍රිකානු උප කලාපීය සුදුසුකම් ලැබීමේ තරගාවලිය යටතේ ඊයේ ගැම්බියාව සමඟ පැවති තරගයේදී කඩුලු 4කට ලකුණු 344ක් රැස් කරමින් සිම්බාබ්වේ පිල මේ වාර්තාව පිහිටුවීය. මින් පෙර එම වාර්තාවට හිමිකම් දී නේපාල කණ්ඩායම පසුගිය වසරේ මොන්ගෝලියාවට එරෙහිව කඩුලු 3ක ලකුණු 314ක් රැස් කර තිබිණි.
නයිරෝබි නුවර පැවති මේ තරගයේදී සිම්බාබ්වේ පිල වෙනුවෙන් විශිෂ්ට ඉනිමක් ක්‍රීඩා කළ සිකන්දර් රාසා පන්දු 43කින් නොදැවී ලකුණු 133ක් රැස් කර තිබුණේ හතරේ පහර 7ක් සහ හයේ පහර 15ක් එල්ල කරමිනි. ඔහුගේ ශතකය පන්දු 33කදී වාර්තා විය.
පිළිතුරු ඉනිම ක්‍රීඩා කළ ගැම්බියා කණ්ඩායමට ඕවර 14.4කදී සියල්ලන් දැවී රැස් කළ හැකි වූයේ ලකුණු 54ක් පමණි. ඒ සමඟ සිම්බාබවේ කණ්ඩායමට තවත් ලෝක වාර්තාවක් හිමි වූයේ විස්සයි20 තරගයකදී කණ්ඩායමක් ලකුණු පරතරය අනුව වාර්තා කළ ඉහළම ජයග්‍රහණය ලෙසිනි. සිම්බාබ්වේ ලකුණු 290කින් ජය ගත් අතර, ඉන් පෙර ඉහළම ඉනිමේ ලෝක වාර්තාව පිහිටුවූ නේපාලය එම තරගය ජය ගෙන තිබුණේ ලකුණු 273කිනි.
