දකුණු අප්‍රිකාවේ පැවති පොදු රාජ්‍ය මණ්ඩලීය සවි එසවීමේ තරගාවලියේදී පදක්කම් 24ක් දිනා ගැනීමට ශ්‍රී ලංකා ක්‍රීඩක ක්‍රීඩිකාවෝ සමත් වූහ. මීට රන් පදක්කම් 14ක්, රිදී පදක්කම් 9ක් සහ ලෝකඩ පදක්කමක් ඇතුළත් විය. දකුණු අප්‍රිකාවේ සන්සිටි නුවර පැවති මේ තරගාවලියට පොදු රාජ්‍ය මණ්ඩලයට අයත් රටවල ක්‍රීඩක ක්‍රීඩිකාවෝ 1,000කට අධික සංඛ්‍යාවක් එක්ව තිබිණි. පදක්කම් දිනූ ශ්‍රී ලංකා කණ්ඩායම පෙරේදා පස්වරුවේ කටුනායක ගුවන්තොටුපොළෙන් යළි මෙරටට පැමිණි අතර, ඔවුන් පිළිගැනීම සඳහා ශ්‍රී ලංකා සවි එසවීමේ සංගමයේ නිලධාරීන් පිරිසක් සහ මේ ක්‍රීඩකයන්ගේ මවුපියන් ඇතුළු පිරිසක් පැමිණ සිටියහ.
