පාස්කු ඉරුදින ත්‍රස්ත ප්‍රහාරය සම්බන්ධයෙන් දෙන ලද ශ්‍රේෂ්ඨාධිකරණ තීන්දුව මඟින් නියම කළ රුපියල් මිලියන හැත්තෑ පහක වන්දි මුදල සම්පූර්ණයෙන් නොගෙවා සිටින රාජ්‍ය බුද්ධි සේවයේ හිටපු ප්‍රධානී නියෝජ්‍ය පොලිස්පති නිලන්ත ජයවර්ධන මහතාට එරෙහිව අධිකරණයට අපහාස කිරීමේ නඩුවක් පවත්වාගෙන යෑමට ශ්‍රේෂ්ඨාධිකරණය ඊයේ (27) තීරණය කළේය. ඒ සම්බන්ධයෙන් කරුණු දැක්වීම සඳහා ලබන ඔක්තෝබර් මස 07 වැනිදා අධිකරණය හමුවේ පෞද්ගලිකවම පෙනී සිටින ලෙස ඔහුට නියම කරමින් සත් පුද්ගල ශ්‍රේෂ්ඨාධිකරණ විනිසුරු මඬුල්ලක් නොතිසි නිකුත් කරන ලදි.
අධිකරණයට අපහාස කිරීම සම්බන්ධයෙන් ඔහුට එරෙහිව කෙටුම්පත් කරන ලද චෝදනා පත්‍රය අධිකරණයට ඉදිරිපත් කර ඇති බව නීතිපතිවරයා එහිදී ශ්‍රේෂ්ඨාධිකරණයට දන්වා සිටීමෙන් අනතුරුව මෙම නියෝගයන් කරන ලදි. පාස්කු ඉරුදින සිදුවූ ත්‍රස්ත ප්‍රහාරයට එරෙහිව ගොනු කරන ලද මූලික අයිතිවාසිකම් පෙත්සම් එකොළහක් සම්බන්ධයෙන් වන තීන්දුව ලබා දෙමින් සත් පුද්ගල ශ්‍රේෂ්ඨාධිකරණ විනිසුරු මඩුල්ල විසින් නියම කරන ලද වන්දි ගෙවීම් සිදු කර තිබේද යන්න සලකා බැලීම සඳහා අදාළ පෙත්සම් සහ ඊට අදාළ ව ගොනු කර ඇති මෝසම් කැඳවූ අවස්ථාවේ දී මෙම නියෝගයන් සිදු කරන ලදි.
අගවිනිසුරු ජයන්ත ජයසූරිය මහතා සහ මුර්දු ප්‍රනාන්දු, එස් තුරෙයිරාජා, ඒ.එච් එම් ඩී නවාස්, කුමුදුනී වික්‍රමසිංහ, ශිරාන් ගුණරත්න, අචල වෙන්ගප්පුලි යන මහත්ම මහත්මීන්ගෙන් සමන්විත විනිසුරු මඩුල්ලක් හමුවේ මෙම පෙත්සම් කැඳවනු ලැබිණි. එහිදී නීතිපතිවරයා වෙනුවෙන් පෙනී සිටි අතිරේක සොලිස්ටර් ජනරාල් දිලීප පීරිස් මහතා සඳහන් කළේ අදාළ නඩු තීන්දුව ලබා දෙමින් ශ්‍රේෂ්ඨාධිකරණය විසින් ගෙවීමට නියම කරන ලද වන්දි මුදල් ගෙවීමට හිටපු ජනාධිපති මෛත්‍රීපාල සිරිසේන මහතා සහ හිටපු පොලිස්පති පූජිත් ජයසුන්දර මහතා පසුගියදා කටයුතු කර ඇති බවය. ඒ අනුව හිටපු ජනාධිපති මෛත්‍රිපාල සිරිසේන මහතාට ගෙවීමට නියම වූ මිලියන සියයක වන්දි මුදල පසුගිය අගෝස්තු මස 16 වැනිදා වන විට ගෙවා අවසන් කර ඇති බව අතිරේක සොලිසිටර් ජනරාල්වරයා සඳහන් කළේය.
හිටපු පොලිස්පති පූජිත ජයසුන්දර මහතා ද තමන්ට නියම වූ සම්පූර්ණ වන්දි මුදල ගෙවීමට අගෝස්තු මත 30 වැනිදා කටයුතු කර ඇති බව අතිරේක සොලිසිටර් ජනරාල්වරයා තවදුරටත් සඳහන් කළේය. රාජ්‍ය බුද්ධි සේවයේ හිටපු ප්‍රධානී නිලන්ත ජයවර්ධන මහතා, තමන්ට ගෙවීමට නියම වූ මිලියන 75ක වන්දි මුදලෙන් මිලියන 5.1 මුදලක් ඉකුත් ඔක්තෝම්බර් 8 වැනිදා ගෙවා ඇති අතර පසුව මිලියන 4.9ක මුදලක් ගෙවා අවසන් කර ඇති බවද අතිරේක සොලිසිටර් ජනරාල්වරයා සඳහන් කළේය. ඉන් අනතුරුව කිසිදු මුදලක් ගෙවීමට ඔහු කටයුතු කර නොමැති බව හානි පූර්ණ කාර්යාලය මඟින් ලබාදුන් වාර්තාවක සඳහන් වන බවද අතිරේක සොලිසිටර් ජනරාල්වරයා තවදුරටත් සඳහන් කළේය.
ඒ අනුව මිලියන 75ක වන්දි මුදල සම්පූර්ණ වශයෙන් නොගෙවීම මඟින් අධිකරණයට අපහාස කිරීමේ සිද්ධියට අදාළව රාජ්‍ය බුද්ධි සේවයේ හිටපු ප්‍රධානී නිලන්ත ජයවර්ධන මහතාට එරෙහිව චෝදනාපත්‍රයක් සකස් කරන ලෙස මීට පෙර ශ්‍රේෂ්ඨාධිකරණය විසින් ලබාදුන් නියෝගය අනුව කෙටුම්පත් කරන ලද චෝදනා පත්‍රය අධිකරණයට ඉදිරිපත් කළ බවද අතිරේක සොලිසිටර් ජනරාල්වරයා එහිදී දන්වා සිටියේය.
ශ්‍රේෂ්ඨාධිකරණය විසින් නියෝග කළ පරිදි රාජ්‍ය බුද්ධි සේවයේ හිටපු ප්‍රධානී නිලන්ත ජයවර්ධන මහතාට එරෙහිව විනය පරීක්ෂණයක් සිදුකිරීම හිටපු මහාධිකරණ විනිසුරු චම්පා ජානකී රාජරත්න මහත්මියගේ ප්‍රධානත්වයෙන් යුතු ත්‍රිපුද්ගල කමිටුවක් විසින් ආරම්භ කළ බවද එහි වාර හයක කටයුතු මේ වන විට අවසන් කර ඇති බවද අතිරේක සොලිසිටර් ජනරාල්වරයා තවදුරටත් දන්වා සිටියේය. එම විනය පරීක්‍ෂණයට යටත්ව නිලන්ත ජයවර්ධන මහතා අනිවාර්ය නිවාඩු යවා ඇති බව ද ඒ මහතා සඳහන් කළේය.
කෙසේ වුවද අදාළ විනය කමිටුවේ සභාපති ධුරය දැරූ චම්පා ජානකී රාජරත්න මහත්මිය වන විට ආණ්ඩුකාර ධුරයකට පත්කර ඇති බැවින් ඇය වෙනුවට එම කමිටුවට විශ්‍රාමික විනිසුරුවරයකු පත් කිරීම සඳහා වන නාමාවලියක් අධිකරණ සේවා කොමිසමෙන් ඉල්ලා ඇති බවද අතිරේක සොලිස්ටර් ජනරාල්වරයා දන්වා සිටියේය. ශ්‍රේෂ්ඨාධිකරණය විසින් මීට පෙර නියම කළ පරිදි හිටපු ආරක්ෂක ලේකම් හේමසිරි ප්‍රනාන්දු මහතා සහ ජාතික බුද්ධි ප්‍රධානී මෙන්ඩිස් මහතාද තමන්ට ගෙවීමට තිබූ නියම කළ සියලු සම්පූර්ණ මුදල ගෙවීමට කටයුතු කර ඇති බව ඒ මහතා එහිදී පෙන්වා දුන්නේය.
ඒ අනුව මෙම පෙත්සම්වලට අදාළව ශ්‍රේෂ්ඨාධිකරණය ගෙවීමට නියම කළ වන්දි මුදල්වලින් රුපියල් බිලියන 246 ක මුදලක් ‘හානි පූර්ණ කාර්යාලය’ වෙත ලැබී ඇති බවද එයින් මිලියන 62ක මුදලක් පාස්කු ප්‍රහාරයේ වින්දිතයන්ට වන්දි ලබාදීම සඳහා වැය කර ඇති බවද අතිරේක සොලිසිටර් ජනරාල්වරයා එහිදී සඳහන් කළේය. එම අවස්ථාවේදී වගඋත්තරකාර අගරදගුරු මැල්කම් කාදිනල් රංජිත් හිමිපාණන් වෙනුවෙන් අධිකරණය හමුවේ පෙනී සිටි ජනාධිපති නීතිඥ ශමිල් පෙරේරා මහතා සඳහන් කළේ අදාළ වන්දි මුදල් ගෙවීම සම්බන්ධයෙන් තොරතුරු ඉල්ලා තමන් විසින් මෝසමක් ඉදිරිපත් කළ බවය.
පාස්කු ප්‍රහාරයේ වින්දිතයන් විසින් වන්දි මුදල් ලබා ගැනීමට අදාළව නඩු තුන්සියයක් පමණ විවිධ අධිකරණවල ගොනුකර ඇති බව සඳහන් කළ ජනාධිපති නීතිඥවරයා එහි පාර්ශ්වකරුවන්ට වන්දි මුදල් ලැබී තිබේ නම් ඔවුන්ට එම නඩු ඉවත් කර ගැනීමේ හැකියාව ඇති බව සඳහන් කළේය. ඒ අනුව හානි පූර්ණ කාර්යාලය විසින් වන්දි ගෙවන ලද පුද්ගලයන්ගේ නම් සහ ඊට අදාළ වන්දි මුදල් පිළිබඳ සවිස්තර වාර්තාවක් තමන්ට ලබා දීමට කටයුතු කරන ලෙස ඔහු අධිකරණයෙන් ඉල්ලා සිටියේය. එහිදී වගඋත්තරකාර හිටපු රාජ්‍ය බුද්ධි සේවයේ ප්‍රධානී නිලන්ත ජයවර්ධන මහතා වෙනුවෙන් පෙනී සිටි ජනාධිපති නීතිඥ චන්දක ජයසුන්දර මහතා සඳහන් කළේ සිය සේවාදායකයාට සියලු ආකාරයෙන් ගෙවීමට හැකියාව තිබූ රුපියල් මිලියන දහයක වන්දි මුදලක් මේ වනවිට ගෙවීමට කටයුතු කළ බවය.
රුපියල් මිලියන 65ක් වන ඉතිරි වන්දි මුදල ගෙවීමට ඔහුට කිසිදු ආකාරයක හැකියාවක් නොමැති බවද ජනාධිපති නීතිඥවරයා සඳහන් කළේය. පොලිසියේ ඉහළම ජ්‍යෙෂ්ඨ නිලධාරියා වන ඔහු මේ වන විට විනය පරීක්ෂණයකට ලක්වී සිටින අතර අනිවාර්ය නිවාඩු යවා සිටින බවද ජනාධිපති නීතිඥවරයා තවදුරටත් සඳහන් කළේය. ඔහුට රුපියල් 1,27,000ක මුදලක් මාසික වේතනයක් ලෙස ලැබෙන අතර ඉන් රුපියල් 40,000 මුදලක් අඩුකර කළ හැකි බවට පොලිස් දෙපාර්තමේන්තුව දන්වා ඇති බවද ජනාධිපති නීතිඥවරයා සඳහන් කළේය .
ඒ අනුව අදාළ මුදල වැටුපෙන් අඩුකර ගැනීම සඳහා අවශ්‍ය නම් අධිකරණයට නියෝගයක් ලබා දිය හැකි බවද සඳහන් කළ ජනාධිපති නීතිඥවරයා මෙම සම්පූර්ණ වන්දි මුදල නොගෙවීම අධිකරණයට අපහාස කිරීමේ චේතනාවකින් හෝ වෙනත් අරමුණකින් සිදු නොකරන බවද, නොහැකියාව මතම සිදු වන්නක් බවද ජනාධිපති නීතිඥවරයා සදහන් කළේය . ඒ සම්බන්ධයෙන් අධිකරණයෙන් සමාව ඉල්ලා සිටින බවද ජනාධිපති නීතිඥවරයා සඳහන් කළේය. කරුණු සලකා බැලූ විනිසුරු මඩුල්ල දැනට වන්දි ගෙවා ඇති සියලුම වගඋත්තරකරුවන් මෙම පෙත්සම්වලින් නිදහස් කිරීමට නියම කළේය.
‘හානි පූර්ණ කාර්යාලය’ සිදු කළ වන්දි ගෙවීමට අදාළ පුද්ගලයන්ගේ නම් සහ ගෙවන ලද මුදල සම්බන්ධයෙන් වන තොරතුරු වාර්තාවක් අගරදගුරු මැල්කම් කාදිනල් රංජිත් හිමිපාණන් සහ එක් පෙත්සම්කාර පාර්ශ්වයක් වන ශ්‍රී ලංකා නීතිඥ සංගමය වෙත ලබාදීමට කටයුතු කරන ලෙස නීතිපතිවරයාට නියම කළේය. නිලන්ත ජයවර්ධන මහතා විසින් මෝසමක් මගින් සහ අධිකරණය හමුවේ ඉදිරිපත් කරුණු විනිසුරු මඩුල්ලේ සැලකිල්ලට ලක්වූ අතර ඔහුට එරෙහිව අධිකරණයට අපහාස කිරීමේ නඩුකරයක් පවත්වාගෙන යෑමට තීරණය කළ බව අගවිනිසුරු ජයන්ත ජයසූරිය මහතා එහිදී සඳහන් කළේය.
ඒ අනුව ඒ සම්බන්ධයෙන් කරුණු දැක්වීම සඳහා අධිකරණය හමුවේ පෞද්ගලිකවම පෙනී සිටින ලෙස රාජ්‍ය බුද්ධි සේවයේ හිටපු ප්‍රධානී නිලන්ත ජයවර්ධන මහතාට නියම කිරීමට විනිසුරු මඬුල්ල තීරණය කළේය. එසේම එදින අධිකරණය හමුවේ පෙනී සිටින ලෙස නීතිපතිවරයාටද නියම කරන ලදි. බුද්ධි තොරතුරු ලැබී තිබියදීත් පාස්කු ප්‍රහාරය වළක්වා ගැනීමට කටයුතු නොකිරීමට එරෙහිව ගොනු කළ මූලික අයිතිවාසිකම් පෙත්සම් 12ක තීන්දුව පසුගිය ජනවාරි මස 12 වැනිදා අගවිනිසුරු ජයන්ත ජයසූරිය මහතා ප්‍රමුඛ සත් පුද්ගල ශ්‍රේෂ්ඨාධිකරණ විනිසුරු මඩුල්ලක් විසින් ලබා දෙන ලදි. එම පෙත්සම්වල වගඋත්තරකරුවන් විසින් ජනතාව ගේ මූලික අයිතිවාසිකම් උල්ලංඝනය කර තිබූ බවට එමඟින් තීරණය කරණු ලැබිණි.
ඒ අනුව ඊට වගකිවයුතු හිටපු ජනාධිපති මෛත්‍රීපාල සිරිසේන මහතාට රුපියල් මිලියන 100ක් ද, හිටපු පොලිස්පති පූජිත් ජයසුන්දර සහ රාජ්‍ය බුද්ධි සේවයේ හිටපු ප්‍රධානී නිලන්ත ජයවර්ධන යන මහත්වරු විසින් රුපියල් මිලියන 75 බැගින් ද හිටපු ආරක්ෂක ලේකම් හේමසිරි ප්‍රනාන්දු මහතා රුපියල් මිලියන 50ක් ද හිටපු ජාතික බුද්ධි ප්‍රධානී සිසිර මෙන්ඩිස් මහතා විසින් රුපියල් මිලියන 10ක් ද වන්දි වශයෙන් ගෙවිය යුතු බව නියෝග කර තිබුණි. එම ශ්‍රේෂ්ඨාධිකරණ තීන්දුව මඟින් වන්දි මුදල් ගෙවීමට ලබා දී තිබූ මාස හයක කාලය අවසන් වීමට පෙර ඒ සඳහා තවදුරටත් කල් ලබා දෙන ලෙස ඉල්ලා හිටපු ජනාධිපති මෛත්‍රිපාල සිරිසේන මහතා ඇතුළු වගඋත්තරකරුවන් ශ්‍රේෂ්ඨාධිකරණයට මෝසම් ගොනුකර තිබුණි.
