අද දිනයේ පෞද්ගලික බස් රථ ධාවනය සියයට 50කින් පමණ අඩුවන බව ශ්‍රී ලංකා පෞද්ගලික බස් හිමියන්ගේ සංගමය පවසයි.එමෙන්ම ජනාධිපතිවරණය පැවැත්වෙන දිනයේ බස් රථ ධාවනය තවදුරටත් පහත වැටෙනු ඇති බව සංගමයේ සභාපති ගැමුණු විජේරත්න මහතා මාධ්‍ය වෙත පැවසීය. මැතිවරණ කටයුතු සඳහා බස් රථ යෙදවීම සහ බස් රථ සේවකයන් ඡන්දය ප්‍රකාශ කිරීමට නිවාඩු ලබා ගැනීම ආදී කාරණා ඊට හේතුවන බවද එතුමා වැඩිදුරටත් පැවසීය.
ලංකා ගමනාගමන මණ්ඩලයේ නියෝජ්‍ය සාමාන්‍යාධිකාරී ධාවන පණ්ඩුක ස්වර්ණහංස මහතා පැවසුවේ ශ්‍රී ලංකා ගමනාගමන මණ්ඩලයට අයත් බස් රථ 1,358ක් පමණ මැතිවරණ රාජකාරී සඳහා වෙන්කර ඇති අතර පොලිස් ඇතුළු ආරක්ෂක අංශ නිලධාරීන්ගේ ගමනාගමන කටයුතු සඳහා බස් රථ 175ක් ලබාදී ඇති බවයි. කෙසේ වෙතත් දුර ගමන් සේවා සඳහා අවශ්‍යතාව පරිදි හැකි පමණ බස් රථ යෙදවීමට පියවර ගන්නා බවද ඔහු මාධ්‍ය වෙත පැවසීය.
