අස්වැසුම ප්‍රතිලාභීන්ටද සමාජ ආරක්ෂණ අරමුදලට එක්වීමට අවස්ථාව ලබාදීමට ජනාධිපතිවරයා විසින් අවස්ථාව ලබා දී ඇති අතර, මේ වසරේ සිට ලක්ෂ විසි හතරක් දක්වා ප්‍රතිලාභීන් සංඛ්‍යාවක් වෙනුවෙන් රුපියල් බිලියන 205ක මුදල් වෙන්කර ඇති බව මුදල් රාජ්‍ය අමාත්‍ය ශෙහාන් සේමසිංහ මහතා සදහන් කළේය.
ඒ මහතා මේ අදහස් ප්‍රකාශ කළේ පසුගියදා (27) අනුරාධපුරයේදී මාධ්‍ය වෙත අදහස් දක්වමිනි.
එහිදී තවදුරටත් අදහස් දැක්වූ රාජ්‍ය අමාත්‍ය ශෙහාන් සේමසිංහ මහතා මෙසේද පැවසීය.
‘රටේ දුප්පත්කම තුරන් කිරීම සඳහා විද්‍යාත්මක ක්‍රමවේදයක් හරහා රජය ක්‍රියාත්මක කළ අස්වැසුම වැඩපිළිවෙළ යටතේ උපරිමය මසකට රුපියල් පහළොස් දහස බැගින් ලක්ෂ දහඅටක් ප්‍රතිලාභ ලබාගනිමින් සිටිනවා. මේ වසරේ සිට ලක්ෂ විසි හතරක් දක්වා ප්‍රතිලාභීන් සංඛ්‍යාවකට ප්‍රතිලාභ ලබාදීමට රජය තීන්දු කර තිබෙන අතර ඒ අනුව රුපියල් බිලියන දෙසිය පහක මුදලක් වෙන්කර තිබෙනවා. රටේ දිළිඳු පවුල් සවිබලගැන්වීම සඳහා වන සමාජ ආරක්ෂණ අරමුදලට දායකත්වය ලබා දී එමගින් අස්වැසුම ප්‍රතිලාභීන්ට ද ප්‍රතිලාභ ලබා ගැනීමට අවස්ථාව ලබාදීමට රජය කටයුතු කර තිබෙනවා.’
‘මැතිවරණ ඉලක්ක කරගෙන සජිත් සහ අනුර ප්‍රකාශ කරන දේ සහ රජය විද්‍යාත්මක ක්‍රමවේදයකට අනුව සිදුකරන ප්‍රකාශ අතර විශාල වෙනසක් පවතිනවා. දිළිඳු ජනතාව වෙනුවෙන් කිඹුල් කඳුළු සලන සජිත් හා අනුර රටේ ආර්ථික අර්බුදය හමුවේ පලා ගියා. ඔවුන් ඉදිරිපත් කර ඇති ප්‍රතිපත්ති ප්‍රකාශය තුළ ලස්සන වචන හැරෙන්නට කිසිදු නැවුම් වැඩපිළිවෙළක් නැහැ. ඒ වගේම තමයි බහු පාර්ශ්විකව ලබාගත් ණය කිසිදු හිඟයකින් තොරව සියලු ගෙවීම් මේ වන විට සිදුකළ අවසන්. ද්වීපාර්ශ්වික ණය පමණක් ගෙවීම අත්හිටුවා තිබෙනවා.
අනුර සහ සජිත් රටේ අමාරුම තත්ත්වයක් පවතින මොහොතේ ද සිදු කරනු ලැබුවේ ආණ්ඩුවේ සහ ජනාධිපතිවරයාගේ වැඩපිළිවෙළ කඩාකප්පල් කිරීමට කටයුතු කිරීම. ඒ නිසා ඔවුන්ට ජනතාවගෙන් බලය ඉල්ලන්න සදාචාරාත්මක අයිතියක් නැහැ. අනුර කුමාර දිසානායක මහතා ඉදිරිපත් කර ඇති ප්‍රතිපත්ති ප්‍රකාශනයේ උපායමාර්ගික කිසිදු වැඩපිළිවෙළක් පැහැදිලිව පෙනෙන්නට නැහැ.’
