ත්‍රස්තවාදය වැළැක්වීමේ පනතේ විධිවිධානයන්ට අනුව අත්අඩංගුවට ගෙන රැඳවුම් නියෝග මත රඳවාගෙන විමර්ශන පවත්වන එල්.ටී.ටී.ඊ.යේ හිටපු ප්‍රධානියකු මෙන්ම හිටපු නියෝජ්‍ය අමාත්‍යවරයකු වන ශිවනේෂතුරෙයි චන්ද්‍රකාන්තන් හෙවත් පිල්ලෙයාන් සමඟ හිටපු ජනාධිපති රනිල් වික්‍රමසිංහ මහතා විසින් දුරකතනයෙන් කතා කිරීමට අවස්ථාවක් ඉල්ලා සිටීම සම්බන්ධයෙන් අපරාධ පරීක්ෂණ දෙපාර්තමේන්තුව මඟින් විමර්ශනයක් ආරම්භ කර තිබේ. හිටපු ජනාධිපතිවරයාගේ මෙම ඉල්ලීම ඔහුගේ ආරක්ෂක අංශ ප්‍රධානියකු මඟින් අපරාධ පරීක්ෂණ දෙපාර්තමේන්තුවේ නිලධාරියකු වෙත දුරකතන ඇමතුමක් ඔස්සේ යොමු කර ඇති බව උසස් පොලිස් නිලධාරියකු පැවසීය.
රැඳවුම් නියෝගයක් මත රඳවා සිටින සැකකරුවකු සමඟ එසේ දුරකතනයකින් කතාබහ කිරීමට අවස්ථාවක් දිය නොහැකි බව සඳහන් කරමින් එම නිලධාරියා විසින් එම ඉල්ලීම කාරුණිකව ප්‍රතික්ෂේප කර තිබේ. අනතුරුව ඔහු ඒ බව සිය උසස් නිලධාරීන් දැනුම්වත් කිරීමට පියවර ගෙන ඇත.
“රැඳවුම් නියෝග මත රඳවා සිටින සැකකරුවන් සමඟ දුරකතනයෙන් කතාබහ කිරීමට මෙන්ම ඥාතීන් හෝ නීතිඥවරු හැරුණුකොට කිසිවකුටත් හමුවීමට නොහැකි බව හිටපු ජනාධිපති රනිල් වික්‍රමසිංහ මහතා හොඳාකාරව දැන සිටින අයෙක්. එහෙම තිබියදී පිල්ලෙයාන් සම්බන්ධයෙන් ඇයි එතුමාට දුරකතන ඇමතුමකින් කතා කරන්න තරම් විශේෂත්වයක් ඇති වෙලා තියෙන්නේ කියන එක අපි හැමෝටම ගැටලුවක්.
අපරාධ පරීක්ෂණ දෙපාර්තමේන්තුව තුළ විවිධ පුද්ගලයන් රඳවාගෙන ප්‍රශ්න කිරීම් සිදු කරලා තියෙනවා. දේශපාලනයට සම්බන්ධ පුද්ගලයන් පවා බොහෝ අය ඒ අතර සිටිනවා. ඒත් ඒ කිසිම අයකු සමඟ කතා කරන්න තිබ්බ නැති උනන්දුවක් ඇයි පිල්ලෙයාන් සම්බන්ධයෙන් හිටපු ජනාධිපතිවරයාට තියෙන්නේ කියන එක සොයා බැලිය යුතුම කාරණාවක්“ යැයි උසස් පොලිස් නිලධාරියකු පැවසීය.
හිටපු ජනාධිපති රනිල් වික්‍රමසිංහ මහතාගේ ඉල්ලීම අපරාධ පරීක්ෂණ දෙපාර්තමේන්තුවේ නිලධාරීන් වෙත යොමු කර ඇත්තේ යැයි පැවසෙන්නේ රනිල් වික්‍රමසිංහ මහතාගේ ආරක්ෂාව භාරව සිටින පෞද්ගලික පොලිස් ආරක්ෂකයාය. ඉදිරියේදී ඒ සම්බන්ධයෙන් එම පොලිස් නිලධාරියාගෙන් ප්‍රශ්න කර අනතුරුව හිටපු ජනාධිපතිවරයාගෙන් ප්‍රශ්න කිරීමට පියවර ගන්නා බව ද එම නිලධාරියා සඳහන් කළේය.
ගයාන් කුමාර වීරසිංහ
