එළැඹෙන පළාත් පාලන මැතිවරණය සඳහා තරග කිරීමට ස්වාධීන කණ්ඩායම් සහ පිළිගත් දේශපාලන පක්ෂ කිහිපයක් මඟින් ඉදිරිපත් කළ නාමයෝජනා පත්‍ර ප්‍රතික්ෂේප කිරීමට එරෙහිව මේ වන විට අභියාචනාධිකරණය හමුවේ රිට් පෙත්සම් ගොනු කර ඇති කොළඹ මහනගර සභාව ඇතුළු පළාත් පාලන ආයතන සඳහා ඡන්ද විමසීම පැවැත්වීමට අදාළ කටයුතු ඉදිරියට කරගෙන යෑමෙන් අද (02) තෙක් වළකින ලෙස අභියාචනාධිකරණය අදාළ තේරීම් භාර නිලධාරීන්ට ඊයේ (01) නියෝග කළේය.
කොළඹ මහනගර සභාව, ඇතුළු පළාත් පාලන ආයතන ගණනාවකට ඉදිරිපත් කළ නාමයෝජනා පත්‍ර ප්‍රතික්ෂේප කිරීමට එරෙහිව පාර්ශ්ව කිහිපයක් මඟින් ගොනු කළ රිට් පෙත්සම් 30කට ආසන්න සංඛ්‍යාවක් සම්බන්ධයෙන් මූලික කරුණු සලකා බැලීමෙන් අනතුරුව මෙම නියෝගය නිකුත් කරන ලදි.
අභියාචනාධිකරණයේ වැඩබලන සභාපති මොහොමඩ් ලෆාර් තාහීර් සහ කේ. ප්‍රියන්ත ප්‍රනාන්දු යන මහත්වරුන්ගෙන් සමන්විත අභියාචනාධිකරණ විනිසුරු මඬුල්ල හමුවේ මෙම පෙත්සම් කැඳවන ලදි. එහිදී මෙම පෙත්සම් කිහිපයක් සම්බන්ධයෙන් වගඋත්තරකාර පාර්ශ්වයන් වෙනුවෙන් මූලික විරෝධතා ඉදිරිපත් කරන ලදි.
කොළඹ මහනගර සභාව වෙනුවෙන් එක්සත් ජනතා නිදහස් සන්ධානය මඟින් ඉදිරිපත් කළ නාමයෝජනා ප්‍රතික්ෂේප කිරීමට එරෙහිව එම පක්ෂය වෙනුවෙන් පෙනී සිටි ජනාධිපති නීතිඥ ෆයිසර් මුස්තාෆා මහතා කරුණු ඉදිරිපත් කළේය. පෙත්සම්කරුවන්ගේ නාමයෝජනා පත්‍ර ප්‍රතික්ෂේප කිරීමට තේරීම් භාර නිලධාරීවරයා විසින් ගත් තීරණය නීති විරෝධී බවට ඔහු කරුණු ඉදිරිපත් කළේය.
සෙසු පෙත්සම්කරුවන් වෙනුවෙන් පෙනී සිටි නීතිඥවරු ද නාමයෝජනා පත්‍ර ප්‍රතික්ෂේප කිරීමට අදාළ තේරීම් භාර නිලධාරීන් විසින් ගත් තීරණය නීති විරෝධී, අසාධාරණ බවට කරුණු ඉදිරිපත් කළහ.
කෙසේ වුවද මෙම පෙත්සම් සම්බන්ධයෙන් වැඩිදුර කරුණු සලකා බැලීම අද (02) සිදු කිරීමට විනිසුරු මඬුල්ල තීරණය කළේය.
පළාත් පාලන ඡන්ද විමසීම සඳහා තමන් ඉදිරිපත් කළ නාමයෝජනා පත්‍ර ප්‍රතික්ෂේප කිරීමට තේරීම් භාර නිලධාරීන් ගත් තීරණය අවලංගු කර අදාළ නාමයෝජනා පත්‍ර යළි භාර ගන්නා ලෙස නියෝගයක් නිකුත් කරන ලෙස මෙම පෙත්සම් මඟින් ඉල්ලා ඇත.
