මත්තේගොඩ යුද හමුදා කඳවුරේ බොක්සිං පුහුණු සැසියකට සහභාගී වෙමින් සිටියදී ඇතිවූ අසාත්මිකතාවක් හේතුවෙන් මාසයක කාලයක් කොළඹ ජාතික රෝහලේ දැඩි සත්කාර ඒකකයේ ප්‍රතිකාර ලබමින් සිටි සාමාන්‍ය සෙබළකු මියගොස් ඇතැයි මත්තේගොඩ පොලීසිය පවසයි.
පසුව සිදුකළ පශ්චාත් මරණ පරීක්ෂණයේදී අනාවරණය වී ඇත්තේ හිසට එල්ල වූ තදබල පහරක් හේතුවෙන් හිස් කබල පුපුරා ගොස් මොළයට රුධිරය වෑහීමෙන් මරණය සිදුව ඇති බවයි.
මෙසේ මියගොස් ඇත්තේ ඇල්පිටිය අමුගොඩ, රස්සන්විල, ගලහිහේන්ගොඩ පදිංචි ගිගිරිවල ගමගේ සඳුන් විරාජ් නමැති 22 හැවිරිදි අවිවාහකයකු බව පොලීසිය කියයි.
මේ පුද්ගලයා 2022 වසරේ යුද හමුදා සේවයට බැඳී ඇති අතර මත්තේගොඩ යුද හමුදා කඳවුරට අනුයුක්තව සේවයේ නිරතව සිටියදී බොක්සිං ක්‍රීඩා කිරීමට සුදුසුකම් ලබා ඉකුත් පෙබරවාරී මස 10 දා එම කඳවුරේ එළිමහන් ක්‍රීඩාංගණයක පුහුණු සැසියකට සහභාගී වී තිබේ.
පුහුණු සැසිය උදෑසන 6.30 සිට 7.30 දක්වා සහ සවස 3.30 සිට 4.30 දක්වා පැවැත්වෙන අතර එදින පස්වරුවේ පැවති පුහුණු සැසියට සහභාගි වී පසුව භට නිවස්නයේ රැඳී සිටියදී තමාට හිසරදය ඇති බව මිතුරකුට පවසා තිබේ.
ඉන් මඳ වේලාවකට පසුව වමනය පිට වී අසාත්මිකතාවකට පත් වීමත් සමඟ ඒ බව ඉහළ නිලධාරීන්ට දන්වා ප්‍රතිකාර සඳහා පනාගොඩ යුද හමුදා රෝහලට ඇතුළත් කර එහිදී මූලික ප්‍රතිකාර ලබාදී පසුව නාරාහේන්පිට යුද හමුදා රෝහලට ඇතුළත් කර තිබේ.
එහෙත් මේ පුද්ගලයාගේ රෝගී තත්ත්වය උත්සන්න වීම නිසා වැඩිදුර ප්‍රතිකාර සඳහා කොළඹ ජාතික රෝහලට ඇතුළත් කර එහිදී ශල්‍යකර්මයකට පවා භාජනය කර දැඩි සත්කාර ඒකකයේ මාසයක කාලයක් ප්‍රතිකාර ලබමින් සිටියදී මෙසේ මියගොස් ඇති බව පොලීසිය පවසයි.
පසුව සිද්ධිය වාර්තා වීමත් සමඟ මත්තේගොඩ පොලීසිය පරීක්ෂණ ආරම්භ කළ අතර කැස්බෑව මහේස්ත්‍රාත්වරයා මත්තේගොඩ යුද හමුදා කඳවුරට පැමිණ ස්ථානීය පරීක්‍ෂණය සිදු කර මාලිගාකන්ද මහේස්ත්‍රාත්වරයාට දැනුම් දී තිබුණේ මෘත දේහය තැන්පත් කර ඇති කොළඹ පොලිස් මෘත ශරීරාගාරයට ගොස් ස්ථානීය පරීක්ෂණයක් සිදු කර මෘත දේහය පිළිබඳ පශ්චාත් මරණ පරීක්ෂණයට නියෝගයක් ලබාදෙන ලෙසයි.
ඒ අනුව මාලිගාකන්ද මහේස්ත්‍රාත්වරයා දුන් නියෝගයකට අනුව කොළඹ ජාතික රෝහලේ විශේෂඥ අධිකරණ වෛද්‍ය නිලධාරී එස්. රවීන්ද්‍රන් මහතා කළ පශ්චාත් මරණ පරීක්ෂණයේ වාර්තාවට අනුව මියගිය පුද්ගලයාගේ හිසට තදබල පහරක් වැදී හිස් කබල පුපුරා ගොස් මොළයට රුධිරය වැගිරීමෙන් වූ මරණයක් බවට නිගමනය කර තිබූ බව පොලීසිය කියයි.
පසුව මළ සිරුර ඥාතීන්ට භාර දුන් අතර ඒ පිළිබඳ අවසන් කටයුතු (15දා) ඇල්පිටිය නාරංඕවිට පොදු සුසාන භූමියේදී සිදු කිරීමට නියමිතව තිබූ අතර සිද්ධිය සම්බන්ධයෙන් සාක්ෂි විමසීමට මියගිය සෙබළාගේ මවුපියන් හා බොක්සිං පුහුණුකරු ඇතුළු ක්‍රීඩකයන් හය දෙනෙකු (24දා) කැස්බෑව අධිකරණයට කැඳවා සාක්ෂි විමසීමට නියමිතය.
සිද්ධිය සම්බන්ධයෙන් මත්තේගොඩ පොලීසියේ ස්ථානාධිපති පොලිස් පරීක්ෂක ඉන්දික කුමාර මහතාගේ උපදෙස් මත පොලිස් සැරයන් (17429) ප්‍රසාද් ගුණරත්න (62371) සරත් ඇතුළු නිලධාරීහු පරීක්ෂණ මෙහෙයවති.
