වාර ප්‍රවේශපත්‍ර අත ඇතිව පාසල නිම වී හැටන් සිට ගිනිගත්හේන දක්වා ඉකුත් (06) දා හැටන් ලංගම ඩිපෝවට අයත් ලංගම බස් රථයකට ගොඩවී සිටි පාසල් ළමුන් පිරිසකට එම බස් රථයේ කොන්දොස්තරවරයා බැණ වැදී බස්රථයෙන් බස්සවා හැරියේ යැයි කියන සිද්ධිය සම්බන්ධයෙන් එම කොන්දොස්තරවරයාට එරෙහිව විමර්ශනයක් ආරම්භ කර ඇති බව හැටන් ලංගම ඩිපෝවේ සහකාර කළමනාකාර (ධාවන) සමන්ත රත්නායක මහතා පැවසීය.
එසේම මෙම සිද්ධිය හේතුවෙන් එම කොන්දොස්තරවරයා රාජකාරිවලින් නිදහස් කර පොරොත්තු ලේඛනයේ රඳවා ඇතැයි ද ඒ මහතා සඳහන් කළේය.
මෙම සිද්ධියට අදාළව නාරාහේන්පිට ලංගම ප්රධාන කාර්යාලයේ විමර්ශන අංශයේ නිලධාරින් පිරිසක් පෙරේදා (08) හැටන් ලංගම ඩිපෝවට පැමිණ එම කොන්දොස්තරවරයාගෙන් ප්‍රකාශයක් සටහන් කරගත් බවත්, ඊට අමතරව හැටන් පොලීසිය මඟින් ද කොන්දොස්තරවරයාගෙන් ප්‍රකාශයක් සටහන් කරගත් බවත් සහකාර කළමනාකාරවරයා පැවසීය.
හැටන් ලංගම ඩිපෝවෙන් මසකට රුපියල් ලක්ෂ පනහක පමණ වාර ප්‍රවේශ පත්‍ර නිකුත් කරන අතර ඉන් වැඩි ආදායමක් පාසල් ළමුන්ගෙන් ලැබෙන බවද ඔහු සඳහන් කළේය.
හැටන් ලංගම ඩිපෝව මඟින් දිනපතා ධාවනය වන දුර සහ කෙටි දුර ඇතැම් බස් රථවල වාර ප්‍රවේශ පත්‍ර ලබාගෙන සිටින පාසල් ළමුන් බස් රථවලට නංවා ගන්නේ නැතැයි එම ප්‍රදේශයේ පාසල් ළමුන් සහ දෙමවුපියෝ නිතර කරන චෝදනාවකි.
හැටන් ප්‍රදේශයේ සිසු සිසුවියන් පිරිසක් අදාළ බස් රථයට ගොඩවී සිටියදී එහි කොන්දොස්තරවරයා ඔවුන්ට එම බස් රථයෙන් බසින ලෙස කියමින් බැණ වදින අයුරු බසයේ සිටි අයකු වීඩීයෝගත කර මාධ්‍ය වෙත නිකුත් කර තිබිණී. එහිදී ප්‍ර‍වාහන ඇමැති බිමල් රත්නායක මහතා මේ සම්බන්ධයෙන් අවධානය යොමුකර එම බස් කොන්දොස්තරවරයා සම්බන්ධයෙන් වහාම විමර්ශනයක් කරන ලෙසට නාරාහේන්පිට ලංගම ප්රධාන කාර්යාලයේ ඉහළ නිලධාරින්ට උපදෙස් ලබා දී තිබිණි.
