දළදා දැක්ම ක්‍රියාත්මක කාලයේදී මහනුවර නගරයේ පාසල් සඳහා නිවාඩු ලබා දෙන බව බව මධ්‍යම පළාත් ආණ්ඩුකාර මහාචාර්ය එස්.බී.එස්.අභයකෝන් මහතා පැවසීය.
දළදා දැක්ම සම්බන්ධයෙන් විශේෂ සාකච්ඡාවක් මධ්‍යම පළාත් ආණ්ඩුකාරවර මහාචාර්ය එස්.බී.එස්.අභයකෝන් මහතාගේ ප්‍රධානත්වයෙන් මහනුවර දිස්ත්‍රික් ලේකම් කාර්යාලයීය ශ්‍රවණාගාරයේදී පසුගිය (6) වැනිදා පැවැත්වුණු අතර එහිදී ආණ්ඩුකාරවරයා මේ බව සඳහන් කළේය.
එම දින කිහිපය තුළදී මහනුවර කේන්ද්‍ර කොට විශේෂ රථ වාහන සැලැස්මක් ක්‍රියාත්මක කරන බව ද හෙතෙම කීවේය.
මෙවර දළදා දැක්ම සඳහා ලක්ෂ 20කට අධික සැදැහැවතුන් පිරිසක් මහනුවරට පැමිණෙතැයි අපේක්ෂා කරන බව ද ඒ මහතා පැවසීය.
දින 10ක කාලයක් පැවැත්වෙන දළදා දැක්ම සඳහා පැමිණෙන සැදැහැවතුන් මාර්ග 3ක් ඔස්සේ ශ්‍රී දළදා මාලිගාවට ප්‍රවේශ කරගන්නා බවත් ඔවුන් වෙනුවෙන් අවශ්‍ය පහසුකම් ශ්‍රී දළදා මාලිගාව, මධ්‍යම පළාත් සභාව, මහනුවර දිස්ත්‍රික් ලේකම් කාර්යාලය සහ මහනුවර මහ නගර සභාව ඇතුළු ආයතන රැසක් එක්ව කටයුතු සම්පාදනය කරන බවත් ඒ මහතා කියා සිටියේය.
පරීක්ෂාවට ලක්කර ගන්නා සැදැහැවතුන් දළදා වන්දනා කිරීමෙන් අනතුරුව විශේෂ අමුත්තන්ගේ දොරටුවෙන් පිටත් කරන බව පැවසූ ආණ්ඩුකාරවරයා ඔවුන් මහ මළුව සහ අවන්හල දෙසින් බැහැරට ගමන් කළ යුතු බව ද සඳහන් කළේය.
මෙම සාකච්ඡාවේදී විශේෂ දළදා ප්‍රදර්ශනය වෙනුවෙන් පැමිණෙන බැතිමතුන් සඳහා පානීය ජලය, සනීපාරක්ෂක පහසුකම්, රාත්‍රී කාලයේ දී දන්සල් පැවැත්වීම, දුම්රිය ඇතුළු ප්‍රවාහන පහසුකම්, ආරක්ෂාව, මහනුවර නගරය අලංකරණය කිරීම, රථ වාහන නියාමනය කිරීම ඇතුළු කරුණු රැසක් සම්බන්ධයෙක් සාකච්ඡා කෙරිණි.
මෙවර මහනුවර ශ්‍රී දළදා මාලිගාවේදී දළදා දැක්ම වසර 10කට පසු පැවත්වෙන අතර එය අප්‍රේල් මස 18 සිට 27 වැනි දින දක්වා පුරා දින 10ක් පැවැත්වීමට කටයුතු යොදා ඇත.
ඒ අනුව අප්‍රේල් 18 වැනි දින පස්වරු 3:00 සිට පස්වරු 5:30 දක්වාත් , ඉන්පසු අප්‍රේල් 19 සිට 27 දක්වා දිනපතා දහවල් 12:00 සිට පස්වරු 5:30 දක්වාත් දින 10ක් පැවැත්වේ.
මේ අවස්ථාට බදුලු මුතියංගණ රජමහා විහාරයේ භාරකාර අස්ගිරි මහ විහාර පාර්ශ්වයේ කාරක සංඝසභික ආචාර්ය මුරුද්දෙණියේ ධම්මරත්න හිමි, මල්වතු පාර්ශ්වයේ නියෝජ්‍ය ලේඛකාධිකාරි මහවෙල රතනපාල හිමි, මධ්‍යම පළාත් ප්‍රධාන ලේකම් අජිත් ප්‍රේමසිංහ, මහනුවර දිස්ත්‍රික් ලේකම් ඉන්දික උඩවත්ත, ආණ්ඩුකාර ලේකම් මංජුලා මඩහපොළ, ප්‍රධාන හා අධ්‍යාපන අමාත්‍යාංශයේ ලේකම් මධුපානි පියසේන මහත්ම මහත්මීන්, ආරක්ෂක අංශ නිලධාරීන් ඇතුළු රාජ්‍ය නිලධාරීහු පිරිසක් සහභාගි වී සිටියහ.
