ශ්‍රී ලංකා ක්‍රිකට් ආයතනය සංවිධාන කළ අන්තර් සමාජ පළමු පෙළ තුන්දින ක්‍රිකට් තරගාවලියේ ශූරතාව දිනා ගැනීමට බ්ලූම්ෆීල්ඩ් ක්‍රීඩා සමාජය සමත් විය. ඔවුන් මේ ශූරතාව දිනා ගත්තේ වසර 15කට පසුව වීම කැපී පෙනේ.
කොළඹ ආර්. ප්‍රේමදාස ක්‍රීඩාංගණයේදී සිවුදින තරගයක් ලෙස පැවති මේ අවසන් තරගය පළමු ඉනිමෙන් ජය ගනිමින් බ්ලූම්ෆීල්ඩ් පිල ශූරතාව දිනා ගත්තේය. තරගයේ පළමු ඉනිමට ලකුණු 508ක් රැස් කිරීමට බ්ලූම්ෆීල්ඩ් පිල සමත්වූ අතර, එන්සීසී පිල පළමු ඉනිමට රැස් කළේ ලකුණු 312ක් පමණි. තරගය ජය පරාජයෙන් තොරව නිමා වන විට දෙවැනියට ක්‍රීඩා කරමින් සිටි බ්ලූම්ෆීල්ඩ් පිල කඩුලු 4කට ලකුණු 242ක් රැස් කර තිබිණි.
ජයග්‍රාහී බ්ලූම්ෆීල්ඩ් පිලට රුපියල් ලක්ෂ 35ක මුදලක් පිරිනැමූ අතර, අනුශූර එන්සීසී පිලට රු. ලක්ෂ 25ක් හිමි විය.
බ්ලූම්ෆීල්ඩ් පළමු ඉනිමේදී ද්විත්ව ශතකයක් (237) රැස් කළ රොන් චන්ද්‍රගුප්ත අවසන් තරගයේ වීරයා ලෙස සම්මාන දිනූ අතර, රු. ලක්ෂ හතහමාරක මුදලක් ද හිමි විය.
කැන්ඩි පිලේ සහන් කෝසල (722) තරගාවලියේ දක්ෂතම පිතිකරු ලෙසත්, තරගාවලියේ වැඩිම කඩුලුලාභියා වූ පොලීසියේ දිලුම් සුදීර (61) තරගාවලියේ දක්ෂතම පන්දු යවන්නා ලෙසත් සම්මාන දිනාගත් අතර, ඔවුන් දෙදෙනාට රුපියල් දසලක්ෂය බැඟින් හිමි විණි.
තරගාවලියේ දෙවැනි වැඩිම කඩුලුලාභියා වූ බ්ලූම්ෆීල්ඩ් පිලේ රවිඳු ප්‍රනාන්දු (52) ලකුණු 415ක් ද රැස් කරමින් දැක්වූ දස්කම් හේතුවෙන් තරගාවලියේ වීරයා ලෙස සම්මාන සමඟ රුපියල් ලක්ෂ 15ක මුදල් ත්‍යාගය හිමිකර ගත්තේය.
බ්ලූම්ෆීල්ඩ් පළමු ඉනිම – 508 (ඕවර 174) රොන් චන්ද්‍රගුප්ත 237, අසිත වන්නිනායක 96, හසිත බෝයගොඩ 52, ලහිරු මදුශංක 55 (ළහිරු කුමාර 87/6, අශේන් ඩැනියෙල් 93/2) සහ දෙවැනි ඉනිම 242/4 (ඕවර 78) අසිත වන්නිනායක නොදැවී 104, නිපුන් කරුණානායක නොදැවී 75 (චාමික කරුණාරත්න 2/18, අශේන් ඩැනියෙල් 42/2)
එන්සීසී පළමු ඉනිම – 312 (ඕවර 85.5) ලහිරු උදාර 145 (ජෙෆ්රි වැන්ඩර්සේ 64/4, රවිඳු ප්‍රනාන්දු 84/3)
