හෙද හෙදියන්ගේ වැටුප් කප්පාදුවක් මෙවර අය-වැය මඟින් සිදු කර ඇති බවට පවසමින් අද (06) රජයේ හෙද නිලධාරීන්ගේ සංගමය ක්‍රියාත්මක කිරීමට නියමිතව තිබූ වෘත්තීය ක්‍රියාමාර්ගය තාවකාලිකව අත්හිටුවූ බව සංගමයේ සභාපති සමන් රත්නප්‍රිය මහතා ‘දිනමිණට’ ඊයේ (05) පැවසීය.
එසේම සෞඛ්‍ය වෘත්තියවේදීන්ගේ සම්මේලනය ද අද (06) පැවැත්වීමට තීරණය කර තිබූ වෘත්තීය ක්‍රියාමාර්ගය තාවකාලිකව අත්හිටුවූ බව එහි සම කැඳවුම්කරු චානක ධර්මවික්‍රම මහතා ‘දිනමිණට’ ඊයේ (05) පැවසීය.
සෞඛ්‍ය හා ජනමාධ්‍ය ඇමැති වෛද්‍ය නලින්ද ජයතිස්ස මහතා සමඟ තම සාමාජිකයන් ඊයේ (05) පැවති සාකච්ඡාවෙන් පසුව අදාළ වෘත්තීය ක්‍රියාමාර්ගය අත්හිටුවීමට තීරණය කළ බව ඒ මහත්වරු පැවසූහ.
ඇමැතිවරයා සමඟ කළ සාකච්ඡාවේදී හෙද හෙදියන්ගේ උසස් වීම් ගැටලුව විසඳන බවට පොරොන්දු වූ බවත් දීමනා කප්පාදුවක් සිදු නොකරන බවට ඇමැතිවරයා ප්‍රකාශ කළ බවත් සමන් රත්නප්‍රිය මහතා ප්‍රකාශ කළේය. තවද හෙද හෙදියන්ට පවතින මූල්‍යමය ගැටලු සම්බන්ධයෙන් මුදල් අමාත්‍යාංශයේ ලේකම්වරයා සමඟ සාකච්ඡාවක් සතියක් ඇතුළත ලබාදීමට පොරොන්දු වූයේ යැයි ද රත්නප්‍රිය මහතා පැවසුවේය.
එසේම අදාළ ගැටලුව සම්බන්ධයෙන් තීරණයක් ගැනීමට මුදල් අමාත්‍යාංශය සමඟ සාකච්ඡා කළ යුතු බවත් එම සාකච්ඡාව වෘත්තීය සමිති නායකයන් ද සම්බන්ධ කර ගනිමින් සිදු කරන බවට ඇමැතිවරයා ප්‍රකාශ කළ බවත් චානක ධර්මවික්‍රම මහතා ප්‍රකාශ කළේය.
