ශ්‍රී ලංකා – සෞදි අරාබියානු මිතුදම තවදුරටත් ශක්තිමත් කරමින් හම්බන්තොට සහ කාත්තන්කුඩි රජයේ රෝහල්වල සිදු කරන අන්ධභාවයට ප්‍රතිකාර කිරීම සහ ඒ සඳහා හේතු වන රෝග මර්දනය කිරීමට අවශ්‍ය ව්‍යාපෘති ක්‍රියාත්මක කිරීමට සෞදි අරාබියානු රජය පියවර ගෙන තිබේ.
ඒ අනුව රෝගීන් දහස් ගණනක් සඳහා සැත්කම් සිදු කිරීම, ඔවුන්ට වෛද්‍ය සේවා සැපයීම, ඖෂධ, වීදුරු සහ කාච දීම සහ සෞඛ්‍ය දැනුවත්භාවය දීම ඇතුළත් වේ. කාත්තන්කුඩි ප්‍රදේශයේදී එම වැඩසටහන පසුගිය 10 වැනිදා සිට 16 වැනිදා දක්වා පැවැති බව ද, වලස්මුල්ල ප්‍රදේශයේදී පෙරේදා 18 වැනිදා මේ වැඩසටහන ආරම්භ වූ බව ද ශ්‍රී ලංකාවේ සෞදි අරාබියානු තානාපති කාර්යාලය පවසයි.
මේ ව්‍යාපෘතිය සහන සහ මානුෂීය කටයුතු සඳහා වූ සෞදි අරාබියාවේ සල්මාන් රජුගේ මධ්‍යස්ථානය විසින් සංවිධාන කරන ලද ව්‍යාපෘතිවල දිගුවකි.
මේ මුලපිරීම වෛද්‍ය අංශයට පමණක් සීමා නොවූ අතර, අක්ෂි රෝග වැළැක්වීම සහ තිරසර සෞඛ්‍ය සේවාවක් සඳහා සහායක පරිසරයක් සැපයීම අරමුණු කර ගත් දැනුම්වත් කිරීමේ වැඩසටහන් හරහා දේශීය ප්‍රජාවන් අතර සෞඛ්‍ය දැනුවත්භාවය වැඩිදියුණු කිරීම ද මීට ඇතුළත් වෙයි. මේ උත්සාහයන් ශ්‍රී ලංකාවේ දහස් ගණනක් ප්‍රතිලාභීන් කෙරෙහි ප්‍රත්‍යක්ෂ ධනාත්මක බලපෑමක් ඇති කරන අතර, බලාපොරොත්තු නැවත ඇති කර ඔවුන්ගේ දෘශ්‍යාබාධිතභාවය නිසා ඇති වූ අභියෝග ජය ගැනීමට උපකාරී වන බව ද එම තානාපති කාර්යාලය පෙන්වා දෙයි.
