ශ්‍රී ලංකා හිටපු ටෙස්ට් නායක හා ආරම්භක පිතිකරු දිමුත් කරුණාරත්න ජාත්‍යන්තර ක්‍රිකට් පිටියෙන් සමු ගැනීමට තීරණය කරයි.
ඔස්ට්‍රේලියාව සමග ආරම්භ වන දෙවැනි ටෙස්ට් තරගය ඔහු ක්‍රීඩා කරන 100 වැනි ටෙස්ට් තරගය වන අතර, එම තරගයෙන් පසුව තමන් ජාත්‍යන්තර ක්‍රිකට් පිටියට සමු දෙන බව දිමුත් සදහන් කර තිබුණි.
එමෙන්ම මේජර් ලීග් තෙදින ක්‍රිකට් තරගාවලිය යටතේ පෙබරවාරි 14 සිට 16 වැනිදා දක්වා කොළඹ එන්.සී.සී ක්‍රීඩාංගනයේදී පැවැත්වීමට නියමිත එන්.සී.සී කණ්ඩායමට එරෙහි තරගයේදී එස්.එස්.සී කණ්ඩායම නියෝජනය කරමින් දිමුත් සිය අවසන් පළමු පෙල තරගයට ක්‍රීඩා කිරීමට නියමිතව තිබේ.
අනතුරුව ඔහු සිය පවුලේ සාමාජිකයින් සමග ලබන මාසයේදී ඔස්ට්‍රේලියාව වෙත සංක්‍රමණය වීමට සූදානමින් පසුවේ.
පසුගිය වසරේදී ටෙස්ට් ක්‍රිකට් පිටියේදී සාර්ථක පිතිහරඹයක නිරත වීමට දිමුත්ට හැකියාවක් නොලැබීමත් සමග කණ්ඩායමේ ඔහුගේ ස්ථානය පිළිබද යම් අවිනිශ්චිත තත්ත්වයක් ද හට ගෙන තිබුණි.
සිය වත්මන් දක්ෂතා පිළිබද මෙන්ම ශ්‍රී ලංකාවට වසරකදී ලැබෙන අඩු ටෙස්ට් තරග සංඛ්‍යාව පිළිබද සලකා බලා තමන් මෙම තීරණය ගත් බව දිමුත් සදහන් කළේය.
“ඇන්ජි [ඇන්ජලෝ මැතිව්ස්] සහ චන්දි [දිනේෂ් චන්දිමාල්] වැනි අනෙකුත් ජ්‍යෙෂ්ඨ ක්‍රීඩකයින් සමඟ කතා කිරීමෙන් පසු මම විශ්‍රාම ගැනීමට තීරණය කළා. අපි තුන්දෙනාම එකවර විශ්‍රාම යනවාට වඩා, අපි එක්කෙනා එක්කෙනා විශ්‍රාම යන එක හොඳයි. යනුවෙන් දිමුත් කියා සිටියා.
අඩු ටෙස්ට් සංඛ්‍යාවක් ක්‍රීඩා කරන නිසා මගේ මීළඟ ඉලක්කය වන ලකුණු 10,000 ට යාමට මට නොහැකි බව මා දන්නවා. ඒ නිසා මම මුලින්ම විශ්‍රාම යාමට සිතුවා. මම මේ දක්වා ලබා ඇති දේ ගැන මට සතුටුයි. මගේ 100 වන ටෙස්ට් තරගයට ක්‍රීඩා කරනවා වගේ සතුටුදායක මොහොතකින් මගේ විශ්‍රාම ගැනීම නිවේදනය කරන්න මම කැමතියි.” යනුවෙන් ද ඔහු සදහන් කළේය.
දිමුත් මේ දක්වා ටෙස්ට් තරග 99කදී ලබා ගෙන ඇති ලකුණු සංඛ්‍යාව 7,172 කි. ඊට ශතක 16 ක් හා අර්ධ ශතක 39 ක් ඇතුළත් ය.
