ආසියානු සංවර්ධන බැංකුවේ නියෝජිත කණ්ඩායමක් සහ නාගරික සංවර්ධන, ඉදිකිරීම් හා නිවාස ඇමැති අනුර කරුණාතිලක මහතා අතර හමුවක් ඊයේ (30) අමාත්‍යාංශයේ දී පැවැත්විණි.
ආසියානු සංවර්ධන බැංකුවෙන් ඉදිරියේදී ශ්‍රී ලංකාවට සැපයෙන සහන ණය ආධාර ලබාදිය යුතු ක්ෂේත්‍ර සම්බන්ධයෙන් මෙහිදී සාකච්ඡා කෙරිණි. මධ්‍යම පාන්තික හා අඩුආදායම්ලාභී ජනතාවගේ නිවාස ඌණතාව සම්බන්ධයෙන් මෙහිදී සාකච්ඡා කෙරිණි.
විෂයභාර ඇමැතිවරයා අදහස් දක්වමින් මෙසේ පැවැසීය. මන්නාරම, යාපනය දිස්ත්‍රික්කවල හා රටේ විවිධ ප්‍රදේශවල ආසියානු සංවර්ධන බැංකුවේ ආධාර යටතේ කළ පානීය ජල ව්‍යාපෘති සම්බන්ධයෙන් ස්තූතිය පුද කළ අතර රටේ ප්‍රධාන පාරිසරික ගැටලුවක් වී ඇති ඝන අපද්‍රව්‍ය කළමනාකරණයට තාක්ෂණික ආධාර අවශ්‍ය බව පැවසීය.
ආසියානු සංවර්ධන බැංකුවේ ජල හා නාගරික සංවර්ධන අධ්‍යක්‍ෂ ශ්‍රීනිවාස් සම්පත් (Mr. Srinivas Sampath) මහතා සහ ජ්‍යෙෂ්ඨ නාගරික සංවර්ධන මෙහෙයුම් විශේෂඥ එල්මා මොශීඩා (Ms. Elma Morsheda) මෙණෙවිය මේ කණ්ඩායමට අයත් වූ අතර නාගරික සංවර්ධන අධිකාරිය, නාගරික ජනාවාස සංවර්ධන අධිකාරිය, ජාතික නිවාස සංවර්ධන අධිකාරිය හා ජල සම්පාදන හා ජලාපවහන මණ්ඩලය ආයතනවල ජ්‍යෙෂ්ඨ නිලධාරීහු මේ අවස්ථාවට සහභාගි වූහ.
