යෝෂිත රාජපක්ෂ මහතාට ලබාදී තිබූ ගිනිඅවි 07න් 05ක් මේ වනවිට ආරක්ෂක අමාත්‍යංශයට භාරදී ඇති බව ආරක්ෂක ලේකම් එයාර් වයිස් මාර්ෂල් සම්පත් තුයියකොන්තා (විශ්‍රාමික) මහතා ප්‍රකාශ කළේය.
දැනට ඔහු සතුව ඇති ගිනිඅවි දෙකෙන් එක් ගිනිඅවියක් නැවත භාර දෙන ලෙස දැනුම් දී ඇති බවත් ඉතිරි ගිනිඅවිය ද ඔහුට ලබාදීමට කටයුතු කරන්නේ ඔහුගේ ආරක්ෂාව සම්බන්ධයෙන් බුද්ධි වාර්තාවක් ලබා ගැනීමෙන් පසුව බව ද ආරක්ෂක ලේකම්වරයා කියා සිටියේය.
ආරක්ෂක අමාත්‍යාංශයේ Bfha (29) පැවති විශේෂ මාධ්‍ය හමුවට එක්වෙමින් ආරක්ෂක ලේකම්වරයා මේ බව සඳහන් කළේය.
පුද්ගල ජීවිත ආරක්ෂාවට ගිනිඅවි බලපත්‍ර 1697ක් ලබා දී ඇති අතර ඉන් ගිනිඅවි 1368ක් මේ වනවිට ආරක්ෂක අමාත්‍යාංශයට ලබා දී ඇති බවට සිදුකළ සංගණනයෙන් හෙළිවී ඇති බව ආරක්ෂක ලේකම්වරයා සඳහන් කළේය.
පුද්ගලයන්ගේ ජීවිත ආරක්ෂාවට ආරක්ෂක අමාත්‍යංශයෙන් ගිනිඅවි බලපත්‍ර 1697ක් ලබා දී තිබූ අතර බලපත්‍ර ලබාදී තිබූ පුද්ගල සංඛ්‍යාව 1550ක් බව ද ආරක්ෂක ලේකම්වරයා කියා සිටියේය. ඉන් ගිනිඅවි 1368ක් ලබා දී ඇති අතර ගිනිඅවි භාර නොදුන් සංඛ්‍යාව 182ක් බව ද හෙතෙම කියා සිටියේය.
සිදුකළ සංගණනයේදී එක් පුද්ගලයකුට එක් ගිනිඅවියකට වඩා ලබා දී ඇති බව හෙළිවී ඇතැයි ද පැවසූ ආරක්ෂක ලේකම්වරයා ඉදිරියේදී එක් පුද්ගලයකුට ආරක්ෂාව සඳහා එක් ගිනිඅවියක් පමණක් ලබාදීමට තීරණය කර ඇති බව ද කියා සිටියේය. නමුත් එක් පුද්ගලයකුට එක් ගිනිඅවියක් ලබා දෙන්නේ ද බුද්ධි තොරතුරු අනුව ඔහුට යම් තර්ජනයක් ඇතිනම් පමණක් බව ද ආරක්ෂක ලේකම්වරයා වැඩිදුරටත් කියා සිටියේය. මෙම ගිනිඅවි පිළිබඳ සංගණනයට සමහර පුද්ගලයන් එක්ව නොසිටින්නේ ඔවුන් විදේශගත වීම සහ වෙනත් හේතු කරණකොටගෙන බවට හෙළිවී ඇතැයි ද කියා සිටියේය.
හිටපු ජනාධිපතිවරුන්ට ආරක්ෂාව සැපයීමේදී ද ඔහුට යම් ජීවිත තර්ජනයක් තිබේද යන්න සලකා බලා ඒ අනුව ආරක්ෂාව සපයන බව ද, හිටපු ජනාධිපති මහින්ද රාජපක්ෂ මහතාට ඩ්‍රෝන ප්‍රහාරයක තර්ජනයක් සම්බන්ධයෙන් බුද්ධි තොරතුරු අනුව අනාවරණය වී නැති බව ද ආරක්ෂක ලේකම්වරයා වැඩිදුරටත් කියා සිටියේය.
