සර්බියාවේ දුම්රිය ස්ථානයක අවිධිමත් ලෙස ඉදිකර තිබූ කොන්ක්‍රීට් වහලක් කඩා වැටී පුද්ගලයන් 15 දෙනකු මියයෑමේ සිදුවීම මුල් කරමින් සර්බියානු අගමැති මිලොස් වූසෙවික් සිය ධුරයෙන් ඉල්ලා අස්වූ බව විදෙස් මාධ්‍ය වාර්තා කරයි. පසුගිය වසරේ නොවැම්බරයේ එම සිදුවීමෙන් පසු එරට අගමැතිවරයාට ඉල්ලා අස්වන ලෙස බල කරමින් එරෙහිව ලක්ෂ සංඛ්‍යාත ජනතාව මාස දෙකකට වැඩි කාලයක් උද්ඝෝෂණ හා විරෝධතා පවත්වා ඇතැයි ද වාර්තා වේ. අගමැතිවරයාගේ ඉල්ලා අස්වීමෙන් පසු රූපවාහිනිය ඔස්සේ ජාතිය අමතා විශේෂ ප්‍රකාශයක් සිදු කළ ජනාධීපති ඇලෙක්සැන්ඩර් වූසිස් පාර්ලිමේන්තු මැතිවරණයක් පවත්වීම හෝ නව රජයක් පිහිටුවීම ඉදිරියේදී තීරණය කරන බව දැනුම් දී තිබේ.
අගමැතිවරයාට එරෙහිව එරට විශ්වවිද්‍යාල සිසුන්ගේ මූලිකත්වයෙන් ආරම්භ කළ විරෝධතාව පසුගියදා බෙල්ග්‍රෙඩ් අගනුවර වැටලීම සහ අගනුවර යා කරන ප්‍රධාන මාර්ග වසා දැමීම දක්වා පැතිරී ගොස් තිබූ බවත්, සර්බියාවේ අගමැතිවරයා ඉල්ලා අස්වූයේ රට පුරා වැඩ වර්ජනයක් ආරම්භ කරන බවට විරෝධතාකරුවන් රජයට අනතුරු ඇඟවීමෙන් පසුව බවත් වාර්තා වේ. එම කොන්ක්‍රීට් වහලය ඉදි කිරිමේදී මහ පරිමාණයෙන් මූල්‍ය වංචා සිදුවී ඇති බවට අනතුරින් පසුව රජයට චෝදනා එල්ල වූ අතර, සිදුවීමෙන් දින කිහිපයකට පසුව සර්බියාවේ ප්‍රවාහන ඇමැතිවරයා ඇතුළු නිලධාරීන් රැසක් සිය තනතුරුවලින් ඉල්ලා අස්වූ බව ද වාර්තා වේ.
