ඉන්දියාවේ 76 වැනි ජනරජ දිනයේ විශේෂ ආරාධිතයකු ලෙස සහභාගි වූ ඉන්දුනීසියාවේ ජනාධිපති ප්‍රබොවෝ සුබියන්ටෝගේ සංචාරය අතරතුර ඉන්දුනීසියාව සහ ඉන්දියාව අතර සමුද්‍ර ආරක්ෂක ගිවිසුම තවත් වසර 3කට දීර්ඝ කිරීම සඳහා අවබෝධතා ගිවිසුම් අත්සන් කළ බව ඉන්දීය මාධ්‍ය වාර්තා කරයි. ඉන්දු පැසිෆික් කලාපයේ ආරක්ෂාව වර්ධනය කිරීම සඳහා විසඳුම් සෙවීම, සමුද්‍රීය දූෂණ වංචා සම්බන්ධව නීතිය බලාත්මක කිරීම ඇතුළු කරුණු රැසකට ප්‍රමුඛත්වය දෙමින් එම ගිවිසුම දීර්ඝ කර ඇතැයි ඉන්දීය මාධ්‍ය වැඩිදුරටත් සඳහන් කරයි. මීට අමතරව දෙරට අතර සෞඛ්‍ය, පාරම්පරික වෛද්‍ය ප්‍රතිකර්ම ඇතුළුව තවත් අවබෝධතා ගිවිසුම් 4කට අත්සන් තබා ඇති අතර, ඉන්දීය මධ්‍යම රජයේ සෞඛ්‍ය හා පවුල් සුබසාධන අමාත්‍යාංශය, ඉන්දීය වෛද්‍ය විද්‍යාව සහ හෝමියෝපති සඳහා වන ඖෂධ කොමිසම අතර එම අවබෝධතා ගිවිසුම් අත්සන් තැබූ බව වාර්තා වේ. ඉන්දීය ජනරජ දිනය සැමරුම් උත්සවය සඳහා ඉන්දුනීසියා හමුදා ඇකඩමියේ සාමාජිකයන් 190 දෙනකුගෙන් සමන්විත සමූහ තූර්ය වාදක කණ්ඩායමක් ද සහභාගි වී ඇත.
