ශ්‍රී ලාංකේය සංගීත ක්ෂේත්‍රය වෙනුවෙන් අමරණීය ගීත රැසක් දායද කළ මෙරට ජ්‍යෙෂ්ඨතම ගායන ශිල්පියකු වන අනිල් භාරතී මහතා (75) රෝගී තත්ත්වයක් හේතුවෙන් පානදුර රෝහලේ නේවාසිකව ප්‍රතිකාර ලබමින් සිටියදී ඊයේ (22) අභාවප්‍රාප්ත විය.
වෙනස් ආරක කටහඩකට උරුමකම් කී අනිල් භාරතී මහතා ගායනා කළ බෙත්ලෙහෙම් පුරේ ගීතය ජාති ආගම් භේදයෙන් තොරව මෙරට සියලුම දෙනා එක සේ රස විදී ගීතයකි. අනිල් භාරතී මහතා නත්තල් ගීත වැඩි වශයෙන් ගායනා කරන ගායකයකු ලෙසද ඉමහත් ප්‍රසිද්ධියක් ඉසිලීය. “රූ මැදියම ගවලෙනේ, සීතල ඇයි උදුවප් මාසේ” වැනි ගීත රැසක් නත්තල වෙනුවෙන් ඔහු ගායනා කර තිබේ. “සීතල සඳ එළියේ, බඹරෙකු ඇඳුණා, ටිකිරිමලී පාසල් යන, ආවා සොයා සොයා,” වැනි ගීතද රසික ජනතාව අතර ඉමහත් ජනප්‍රියත්වයක් උසුලනු ලබයි.
1950 වසරේ ජනවාරි මස 08 වැනි දා උපන් අනිල් භාරතී මහතා 70, 80 දශකයේ ගෝල්ඩන් චයිමස් සංගීත කණ්ඩායම සමඟ සංගීත ක්ෂේත්‍රයට පිවිසීය. හෙතෙම 1977 දී ක්ලැරන්ස් විජේවර්ධන ලියා සංගීතවත් කළ අද වෙයි ඉරු දින ගීතයෙන් ගායන දිවිය ආරම්භ කළේය. එමෙන්ම ක්ලැරන්ස් විජේවර්ධන සමඟ ලෝටස් ඇල්බමයෙන් ඉන්ද්‍රාණි, අනස්ලි, අනිල් සංකලනය සංගීත ලොව නව ආරකට ගෙන යන්නට විය.
පානදුර, මාලමුල්ල අනිල් භාරතී පෙදෙසේ පදිංචිව සිටි ඒ මහතා දෙදරු පියකුද වෙයි. කොළඹ වෙස්ලි, පානදුර ශ්‍රී සුමංගල (පිරිමි), සහ මොරටුව වේල්ස් කුමාර විද්‍යාලවලින් අධ්‍යාපනය ලබා ඇති අනිල් භාරතී මහතා ප්‍රවෘත්ති නිවේදකයකු, වැඩසටහන් ඉදිරිපත් කරන්නකු ලෙසින් කටයුතු කර ඇත.
අනිල් භාරතී මහතාගේ දේහය පානදුර මහින්ද ජයකොඩි මල් ශාලාවේ තැන්පත් කිරීමට නියමිත ඇත. අවසන් කටයුතු ජනවාරි 26 වැනි ඉරිදා පානදුර මිනුවන්පිටිය ආදහනාගාරයේදී සිදුකර හෂ්මාවශේෂ පානදුර එවැන්ජලිස්ත ශාන්ත යොහාන්තුමගේ දේවස්ථාන සුසාන භූමියේ තැන්පත් කිරිමට නියමිතය.
