දැහැමි සෙනෙත්මාගේ විශිෂ්ට පිතිහරඹයත්, චමෝදි ප්‍රබෝධා ප්‍රමුඛ පන්දු යවන්නියන්ගේ දක්ෂ පන්දු යැවීමත් හේතුවෙන් අවුරුදු 19න් පහළ කාන්තා විස්සයි20 ලෝක කුසලාන ක්‍රිකට් තරගාවලිය ආරම්භ කරමින් සහභාගිවූ පළමු තරගයෙන් ලකුණු 139ක සුපිරි ජයක් හිමි කර ගැනීමට ශ්‍රී ලංකා යොවුන් ක්‍රීඩිකාවෝ සමත් වූහ.
‘ඒ’ කාණ්ඩය යටතේ සත්කාර මැලේසියානු පිල සමඟ ඊයේ ක්වාලාලම්පූර්හි බයුමස් ඕවල් පිටියේදී පැවති තරගයේ පළමුව පන්දුවට පහර දුන් ශ්‍රී ලංකා කණ්ඩායම කඩුලු 6ක් දැවී ලකුණු 162ක් රැස් කළ අතර, එම ඉලක්කය හමුවේ මැලේසියානු පිලට සියල්ලන් දැවී රැස් කළ හැකි වූයේ ලකුණු 23ක් පමණි.
මෙය අවුරුදු 19න් පහළ කාන්තා විස්සයි20 ලෝක කුසලාන ඉතිහාසයේ කණ්ඩායමක් දැවී ගිය අඩුම ලකුණු සංඛ්‍යාව ලෙස වාර්තා වූ අතර, ශ්‍රී ලංකා ජය කණ්ඩායමක් ලකුණු පරතරය අනුව වාර්තා කළ දෙවැනි ඉහළම ජය විය.
මින් පෙර පසුගියවර (2023) තරගාවලියේදී එංගලන්තය හමුවේ සිම්බාබ්වේ පිල ලකුණු 25කට දැවී ගොස් තිබූ අතර, එම තරගයෙන් එංගලන්තයට ලකුණු 174ක ජයක් හිමි විය.
ඊයේ තරගයේදී නූර් ආලියා බින්ටි ලකුණු 7ක් රැස් කරමින් මැලේසියානු ඉනිමේ වැඩිම ලකුණුලාභිනිය වූ අතර, සුවබිකා මනිවන්නන් ලකුණු 6ක් රැස් කළාය. සෙසු පිතිකාරිනියන්ට ලකුණු 5 සීමාවට පිවිසීමට අවස්ථාවක් නොලැබුණු අතර, පිතිකාරිනියෝ 6 දෙනකුම ලකුණු නොලබා දැවී ගියහ. දක්ෂ පන්දු යැවීමක නිරතවූ චමෝදි ප්‍රබෝධා ඕවර 4කදී නිලකුණු ඕවර 2ක් ද සමඟ ලකුණු 5කට කඩුලු 3ක් බිඳ දැමූ අතර, ලිමන්සා තිලකරත්න ලකුණු 3කට කඩුලු 2ක් සහ මනුදි නානායක්කාර ලකුණු 8කට කඩුලු 2ක් දවා ගත්හ.
මැලේසියානු පිලේ ආරාධනයෙන් පළමුව පන්දුවට පහර දුන් ශ්‍රී ලංකා ඉනිමට වේගවත් ආරම්භයක් දුන් සංජනා කාවින්දි පන්දු 13කින් ලකුණු 30ක් රැස් කළේ හතරේ පහර 6ක් සමඟිනි. ඇය පළමු කඩුල්ල ලෙස දැවී යෑමෙන් පසු පිටියට පිවිසි දැහැමි සෙනෙත්මා ඉනිමේ අවසන් ඕවර තෙක් පිටියේ රැඳෙමින් පන්දු 52කින් ලකුණු 55ක් රැස් කළාය.
තෙවැනි කඩුල්ලට නායිකා මනුදි නානායක්කාර (14) සමඟ එක්ව පන්දු 31කින් ලකුණු 40ක් රැස් කළ දැහැමි, මනුදිගේ දැවී යෑමෙන් අනතුරුව හිරුණි හංසිකා සමඟ එක්ව පන්දු 41කින් ලකුණු 49ක් එක් කළාය. හිරුණි පන්දු 21කින් ලකුණු 28ක් රැස් කළාය. දැහැමි තරගයේ දක්ෂතම ක්‍රීඩිකාව ලෙස සම්මාන ලැබූ අතර, පන්දු යැවීමේදී සිටි නවාස් කඩුලු 2ක් දවා ගත්තාය.
ශ්‍රී ලංකා පිල සහභාගි වන තරගාවලියේ දෙවැනි තරගය හෙට (21) බටහිර ඉන්දීය කොදෙව් පිලට එරෙහිව ක්වාලාලම්පූර්හි බයුමස් ඕවල් පිටියේදීම පැවැත්වේ.
ඉන්දියාවට ජය
මේ අතර ඊයේ ‘ඒ’ කාණ්ඩය යටතේ පැවති අනෙක් තරගයෙන් කඩුලු 9ක විශිෂ්ට ජයක් හිමිකර ගැනීමට ඉන්දීය ක්‍රීඩිකාවෝ සමත් වූහ.
බටහිර ඉන්දීය කොදෙව් පිල සමඟ පැවති තරගයේදී කොදෙව් පිල ලකුණු 44කට දවාගත් ඉන්දීය පිල ඕවර 4.2කදී ජය හිමි කර ගත්තේ කඩුල්ලක් පමණක් අහිමි කර ගනිමිනි.
ශ්‍රී ලංකා 19න් පහළ කාන්තා කණ්ඩායම – 162/6 (ඕවර 20) දැහැමි සෙනෙත්මා 55, සංජනා කාවින්දි 30, හිරුණි හංසිකා 28, මනුදි නානායක්කාර 14, ශෂිනි ගිම්හානි නොදැවී 13 (සිටි නවාස් 31/2)
මැලේසියානු 19න් පහළ කාන්තා කණ්ඩායම – 23 (ඕවර 14.1) නූර් ආලියා බින්ටි 7 (චමෝදි ප්‍රබෝධා 5/3, ලිමන්සා තිලකරත්න 3/2, මනුදි නානායක්කාර 8/2)
