සමස්ත සමාජයම ගැඹුරු පරිවර්තනයකට ලක් කර රට ආර්ථික, පාරිසරික, සමාජයීය වශයෙන් සාධනීය වෙනසක් කරා ගෙන යෑම උදෙසා ආරම්භ කළ Clean Sri Lanka වැඩසටහනට විරුද්ධ වන්නේ සමාජ පරිවර්තනයට අකැමැති පිරිසක් බවත් එවැනි විරෝධයන්ට ආණ්ඩුව කිසි අවස්ථාවක යටත් නොවන බවත් අගමැතිනි, ආචාර්ය හරිනි අමරසූරිය මෙණෙවිය පාර්ලිමේන්තුවේදී ඊයේ (08) ප්‍රකාශ කළාය.
Clean Sri Lanka වැඩසටහන පිළිබඳ ලබන 21 සහ 22 දෙදින විවාදයක් පැවැත්වෙන බවත් මේ වැඩසටහන ගැන ජනතාවට අවබෝධයක් ලබාගැනීම සඳහා විවාදය පැවැත්වෙන බවත් අගමැතිනිය පැවසුවාය. ඇතැම් ආයතන Clean Sri Lanka වැඩසටහන මුල් කර ගනිමින් යම් වැඩසටහන් සිදු කරනු ලබන්නේ එම වැඩසටහනේ මුඛ්‍ය අරමුණ තේරුම් නොගෙන බවත් අගමැතිනිය සඳහන් කළාය.
ඇය මේ බව පැවසුවේ පාර්ලිමේන්තු මන්ත්‍රී අසිත නිරෝෂණ මහතා විසින් නඟන ලද ප්‍රශ්නයකට පිළිතුරු දෙමිනි. “මෙම සංකල්පය ක්‍රියාත්මක කරගෙන යෑමේදී යම් යම් අඩුපාඩු සිදුවෙන්න පුළුවන්. මෙය බලෙන් ක්‍රියාත්මක කරන්න පුළුවන් වැඩසටහනක් නෙවෙයි. මෙය අලුත් වැඩක්. නීතියක් ගෙනත් මෙහෙම කරන්න කියන වැඩසටහනක් නෙවෙයි. අපිටත් මෙය අලුත් වැඩක්. අපිත් මෙය නිවැරදි කරමින් යනවා. ජනවාරි 21 සහ 22 යන දෙදින මේ සම්බන්ධයෙන් දින දෙකක් ලබා දෙනවා. රාජ්‍ය නිලධාරීන් දේශපාලන අංශ මේ සම්බන්ධයෙන් තේරුම්ගෙන කටයුතු කළ යුතුයි.
මේ සම්බන්ධයෙන් ඕනෑම අභියෝගයකට මුහුණ දීමට වත්මන් ආණ්ඩුව සූදානම්. ආණ්ඩුව නියෝජනය කරන්නේ ජනතාව බැවින් ජනවරම අනුව කටයුතු කරනවා. යැයි ද අගමැතිනිය පැවසුවාය.
Clean Sri Lanka වැඩසටහන ආයතන මට්ටමින් සිදු කරන වෙනසක් නොව සමාජ වෙනසක්. සමාජ වෙනසක් තුළ ජනතාවගේ පරිවර්තනයක් සිදුවිය යුතුයි. මෙය දවසකින්, පැය 24කින් සිදු වන දෙයක් නොව මෙය ක්‍රියාවලියක් යැයි ද ඇය වැඩිදුරටත් කීවාය.
