පිට පිට දෙවැනි වරටත් නවසීලන්ත පන්දු යවන්නන් හමුවේ මුල් පෙළ පිතිකරුවන් අසාර්ථක වීම නිසා කඩුලු ත්‍රිත්වයක් සහිත මහීෂ් තීක්ෂණගේ දක්ෂ පන්දු යැවීමත්, කමිඳු මෙන්ඩිස්ගේ සටන්කාමී ඉනිමත් අපතේ යවමින් එක්දින තරගාවලියත් වේලාසනින්ම පරාජය වීමට ශ්‍රී ලංකාවට සිදු විය.
ඊයේ හැමිල්ටන්හිදී පැවති දෙවැනි එක්දින තරගය ලකුණු 113කින් ජය ගැනීමට නවසීලන්තය සමත් වූ අතර, ඒ සමඟ තරග 3කින් සමන්විත තරගාවලියේ ජය 2-0ක් ලෙස නවසීලන්තය සතු වූයේ තරගයක් ද ඉතිරිව තිබියදීය.
වර්ෂාවෙන් බාධා වීම හේතුවෙන් පැය දෙකහමාරකට ආසන්න කාලයක් ප්‍රමාද වූ තරගයේ ඉනිමක් ඕවර 37කට සීමා වූ අතර, කාසියේ වාසිය දිනාගත් ශ්‍රී ලංකා පිලේ ආරාධනයෙන් පළමුව පන්දුවට පහර දුන් නවසීලන්තය කඩුලු 9ක් දැවී ලකුණු 255ක් රැස් කළේය. එම ඉලක්කය හඹා ගිය ශ්‍රී ලංකා කණ්ඩායමට ඕවර 30.2කදී සියල්ලන් දැවී රැස් කළ හැකි වූයේ ලකුණු 142ක් පමණි.
ආරම්භක පිතිකරුවන් වූ පැතුම් නිස්සංක (1), අවිශ්ක ප්‍රනාන්දු (10) සමඟ කුසල් මෙන්ඩිස් (2) සහ නායක චරිත් අසලංක (4) ලකුණු 23ක් තුළ දැවී යද්දී අංක 4 පිතිකරු ලෙස පිටියට පිවිසි කමිඳු මෙන්ඩිස් සිය හොඳම එක්දින ඉනිම ක්‍රීඩා කළ සෙසු පිතිකරුවන්ගෙන් සහායක් නොලැබීමෙන් පරාජය උරුම විය.
කමිඳු සිය හොඳම එක්දින ඉනිම ලෙස පන්දු 66කින් ලකුණු 64ක් රැස් කළේ හතරේ පහර 5ක් සහ හයේ පහර 3ක් සමඟිනි. ජනිත් ලියනගේ ලකුණු 22ක් සහ චමිඳු වික්‍රමසිංහ ලකුණු 17ක් ඉනිමට එක් කළහ. පන්දු යැවීමේදී විල් ඕ’රූකී කඩුලු 3ක් සහ ජෙකම් ඩෆී කඩුලු 2ක් දවා ගත්හ.
නවසීලන්ත ඉනිමට සාර්ථක ආරම්භයක් දුන් රචින් රවින්ද්‍ර පන්දු 63කදි හතරේ පහර 9ක් සහ හයේ පහරක් සමඟ ලකුණු 79ක් රැස් කළ අතර, ඔහුට අනගි සහායක් දුන් මාක් චැප්මන් දෙවැනි කඩුල්ලට ලකුණු 112ක සබඳතාවක් ගොඩනැඟුවේය. චැප්මන් ලකුණු 62කට දැවී ගිය අතර, දක්ෂ පන්දු යැවීමක නිරත වූ මහීෂ් තීක්ෂණ කඩුලු ත්‍රිත්වයක් ද සමඟ කඩුලු 4ක්, වනිඳු හසරංග කඩුලු 2ක් දවාගත් අතර, ඒෂාන් මාලිංග මංගල එක්දින කඩුල්ල දවා ගැනීමට සමත් විය.
ඉනිමේ 35 වැනි ඕවරයේ 5 වැනි පන්දුවෙන් මිචෙල් සැන්ට්නර් දවාගත් තීක්ෂණ ඊළඟ පන්දුවෙන් නේදන් ස්මිත්ගේ කඩුල්ල බිඳ දැමූ අතර, යළි 37 වැනි ඕවරය ක්‍රියාත්මක කළ ඔහු පළමු පන්දුවෙන් මැට් හෙන්රි දවා ගත්තේ සිය කඩුලු ත්‍රිත්වය සපුරා ගනිමිනි. ජාත්‍යන්තර එක්දින පිටියේ ශ්‍රී ලංකා වෙනුවෙන් කඩුලු ත්‍රිත්වයක් වාර්තා වූ 10 වැනි අවස්ථාව මෙය වන අතර, 7 වැනි පන්දු යවන්නා ලෙස ඔහු වාර්තා පොතට එක් විය. මින් පෙර ලසිත් මාලිංග (3), චමින්ද වාස් (2), ෆර්වෙස් මහරුෆ්, තිසර පෙරේරා, වනිඳු හසරංග සහ ශෙහාන් මදුෂංක එක්දින කඩුලු ත්‍රිත්ව වාර්තා කර තිබිණි.
දෙපිල අතර තෙවැනි සහ අවසන් එක්දින තරගය අනිද්දා (11) ඕක්ලන්ඩ්හිදී පැවැත්වේ.
