චීනයේ ව්‍යාප්ත වන එච්.එම්.පී.වී. වෛරසය ශ්‍රී ලංකාව තුළ ඇතැම් අවස්ථාවලදී හඳුනාගත් වයිරස් රෝගී තත්ත්වයක් බව වෛද්‍ය පර්යේෂණ ආයතනයේ වෛරස් රෝග විශේෂඥ වෛද්‍ය ජූඩ් ජයමහ මහතා පැවසීය.
එම වෛරසය සම්බන්ධයෙන් අනියත බියක් ඇති කර නොගත යුතු බවත් සාමාන්‍ය කැස්ස, සෙම්ප්‍රතිශ්‍යාව, මඳ උණ ගතිය අදාළ වෛරසයේ රෝග ලක්ෂණ බවත් ඒ මහතා පැවසුවේය. ශ්‍රී ලංකා වෛද්‍ය සංගමයේ පැවති මාධ්‍ය හමුවට එක්වෙමින් ඒ මහතා මේ බව පෙරේදා (07) ප්‍රකාශ කළේය.
විවිධ නිදන්ගත රෝග සහිත පුද්ගලයින්ට මෙම වයිරසය ආසාදනය වුවහොත් හුස්ම ගැනීමේ අපහසුතාවකට පත්ව නියුමෝනියාව තත්ත්වයට පත්විය හැකි බවත් එය කලාතුරකින් සිදු වන සිද්ධියක් බවත් ඒ මහතා පැවසුවේය.
සෙනඟ ගැවසෙන ස්ථානවලට යාමෙන් වැළකීම, මුව ආවරණ පැලඳීම යනාදි ආරක්ෂිත ක්‍රමවේද අනුගමනය කිරීමෙන් මෙම වෛරසයේ ව්‍යාප්තිය වළක්වා ගත හැකි බව ද ඒ මහතා ප්‍රකාශ කළේය.
