සුභාෂිණී සේනානායක
‘ක්ලීන් ශ්‍රී ලංකා’ වැඩසටහනට සමගාමීව දුම්රිය ස්ථාන පිරිසුදු කිරීමේ කටයුතු පෙරේදා (07) ආරම්භ කෙරිණි.
කොටුව දුම්රිය ස්ථානය කේන්ද්‍ර කර ගනිමින් ප්‍රධාන වැඩසටහන ඊයේ (08) පෙරවරුවේ ප්‍රවාහන මහාමාර්ග වරාය හා සිවිල් ගුවන්සේවා අමාත්‍යාංශයේ ලේකම් කපිල සී. පෙරේරා මහතාගේ ප්‍රධානත්වයෙන් ආරම්භ විය.
දිවයින පුරා තවත් දුම්රිය ස්ථාන 100ක් ආශ්‍රිතව ද මේ වැඩපිළිවෙළ ක්‍රියාත්මක බව දුම්රිය සාමාන්‍යාධිකාරි ධම්මික ජයසුන්දර මහතා පැවැසීය.
දුම්රිය අංගණ, වේදිකා සහ දුම්රිය මැදිරි පවිත්‍ර කිරීම ද වැසිකිළි පද්ධති වැඩිදියුණු කිරීම ද ඊට සමගාමීව සිදු කෙරෙන බව දුම්රිය දෙපාර්තමේන්තුව පැවැසීය.
ඒ සඳහා දෙපාර්තමේන්තු සාමාජිකයන්, ස්වේච්ඡා සංවිධාන නියෝජිතයන් ඇතුළු පිරිසක් සහභාගි වෙති.
ඡායාරූපය – සුදත් නිශාන්ත
මහජන ආරක්ෂක අමාත්‍යාංශය
රක්ෂණ ශ්‍රියන්ත
‘ක්ලීන් ශ්‍රී ලංකා’ ජාතික වැඩසටහන ක්‍රියාත්මක කළ යුතු ආකාරය පිළිබඳව මහජන ආරක්ෂක සහ පාර්ලිමේන්තු කටයුතු අමාත්‍යාංශය හා ඒ යටතේ පවතින දෙපාර්තමේන්තුවල නිලධාරින් දැනුම්වත් කිරීමේ වැඩසටහනක් පෙරේදා (07) මහජන ආරක්ෂක සහ පාර්ලිමේන්තු කටයුතු අමාත්‍යාංශ ප්‍රධාන ශ්‍රවණාගාරයේදී පැවැත්විණි.
මේ දැනුම්වත් කිරීම ජනාධිපති ජ්‍යෙෂ්ඨ අතිරේක ලේකම් ජී. එම්. ඩී. ආර්. අපෝන්සු මහතා විසින් සිදු කරන ලදි.
‘ක්ලීන් ශ්‍රී ලංකා’ ජාතික වැඩසටහන ක්‍රියාත්මක කිරීමේදී මහජන ආරක්ෂක සහ පාර්ලිමේන්තු කටයුතු අමාත්‍යාංශය සහ එම අමාත්‍යාංශය යටතේ පවතින දෙපාර්තමේන්තුවල වගකීම ඒ මහතා විසින් පැහැදිලි කරන ලදි.
මේ අවස්ථාවට මහජන ආරක්ෂක සහ පාර්ලිමේන්තු කටයුතු අමාත්‍යාංශය, ශ්‍රී ලංකා පොලිස් දෙපාර්තමේන්තුව, ආගමන හා විගමන දෙපාර්තමේන්තුව, අන්තරායකර ඖෂධ පාලක ජාතික මණ්ඩලය, රාජ්‍ය නොවන සංවිධාන පිළිබඳ ජාතික ලේකම් කාර්යාලය, ජාතික පොලිස් අභ්‍යාස ආයතනය සහ පොලිස් විශේෂ කාර්ය බළකාය යන ආයතනවල ජ්‍යෙෂ්ඨ නිලධාරීහු සහභාගි වූහ.
