අර්බුද රැසකට ලක්වූ ශ්‍රී ලංකා රග්බි ආයතනයේ වාර්ෂික මහ සභා රැස්වීම සහ නිලවරණය ලබන ජනවාරියේ 21 වැනිදා පැවැත්වීමට නියමිත බව වාර්තා වේ. ව්‍යස්ථා සංශෝධන අර්බුදයක් හේතුවෙන් දිග්ගැස්සුණු රග්බි නිලවරණය අභියාචනාධිකරණයෙන් මේ මස මුල් භාගයේදී සමථයකට පත්වීමෙන් පසු නිලවරණ කමිටුව පත් කිරීමේ විශේෂ මහ සභා රැස්වීම පසුගියදා පැවති අතර, ඒ අනුව රග්බි ආයතනයේ නව නිලධාරී මණ්ඩලය තෝරාපත් කරගැනීම සඳහා නාමයෝජනා කැඳවීමට සහ නිලවරණය පැවැත්වීමට නිලවරණ කමිටුව පියවර ගෙන තිබේ.
රග්බි ආයතනයේ නිලවරණය සඳහා නාමයෝජනා භාරදීම අද පස්වරුවේ නිමාවට පත්වන අතර, මෙවර නිලවරණය සඳහා නාමයෝජනා භාරදීමට පසුගියදා පළාත් සංගම්වල නාමයෝජනා සම්මත කරගෙන ඇතැයි ද වාර්තා වේ. මේ සඳහා බස්නාහිර පළාත් රග්බි සංගමයේ නාමයෝජනා කැඳවීමේදී එම සංගමයේ හිටපු සභාපතිවරයකු සහ කීර්තිමත් රග්බි පරිපාලකයකු වන ෆසාල් මොහොමඩ් මහතා ඡන්ද 16ක් ලබා ගනිමින් රග්බි ආයතනයේ මීළඟ සභාපතිවරයා ලෙස තරග වැදීමට නියමිතව ඇතැයි ආරංචි මාර්ග සඳහන් කළේය. රග්බි සභාපති ධුරය සඳහා බස්නාහිර පළාත් සංගමයේ සිදුකළ ඡන්ද විමසුමේදී හිටපු සභාපතිවරුන් වන රිස්ලි ඉල්යාස් සහ ලසිත ගුණරත්න මහත්වරුන්ට පිළිවෙළින් ඡන්ද 8ක් සහ ඡන්ද 5ක් ලැබුණු බවත් ආරංචි මාර්ග වැඩිදුරටත් සඳහන් කළේය. එහිදී රග්බි ආයතනයේ නිලවරණයට නියෝජ්‍ය සභාපතිවරයා ලෙස නාමයෝජනා භාදීමට රොෂාන් ඩීන්, උපසභාපති ධුරයට එස්.ඩබ්. චැංග්, ලේකම් ධුරයට වරුණ ද සිල්වා සහ භාණ්ඩාගාරික ධුරයට ඒ.එච්.එම්. රියාස් මහත්වරුන්ගේ නම් වැඩි ඡන්දයෙන් සම්මත වී ඇතැයි ද වාර්තා වේ.
මේ අතර රග්බි නිලවරණය සඳහා ඉදිරිපත් වන අපේක්ෂකයන් තෝරාගැනීමට බස්නාහිර පළාත් රග්බි සංගමයේ පැවති ඡන්ද විමසුමෙන් පරාජයට පත්වූ ඇතැම් පාර්ශ්ව නිලවරණයට පෙර රග්බි ව්‍යවස්ථාව සංශෝධන නොකිරීමෙන් ජාත්‍යන්තර තහනමක් පැනවීමේ අවදානමක් මතුවනු ඇතැයි ජනාධිපතිවරයා සහ අගමැතිවරිය දැනුම්වත් කිරීම සඳහා සැලැසුම් කරමින් සිටින බව වාර්තා වේ. ඔවුන් එවැනි උත්සාහයක නිරතවී සිටින්නේ නිලවරණයට පසුව පත්වන නිලධාරීන් රග්බි ආයතනයේ ව්‍යවස්ථාව සංශෝධනය කිරීමට පියවර ගත යුතු බවට අභියාචනාධිකරණයේදී සමථයකට පත්වී තිබියදී බව ද වැඩිදුරටත් වාර්තා වේ.
