හිටපු සෞඛ්‍ය ඇමැති කෙහෙළිය රඹුක්වැල්ල මහතාට අයත් රුපියල් ලක්ෂ 200කට අධික වටිනාකමක් සහිත ජංගම සහ ස්ථාවර බැංකු තැන්පතු ගිණුම් දෙකක් ලබන 24 වැනිදා දක්වා අල්ලස් හෝ දූෂණ චෝදනා විමර්ශන කොමිෂන් සභාව මඟින් අත්හිටුවා ඇත.
මේ පිළිබඳ අධිකරණයට කරුණු දක්වා එම තහනම් නියෝගය ඉදිරි මාස 3ක කාලයක් සඳහා දීර්ඝ කිරීමට අවශ්‍ය නීති ක්‍රියාමාර්ග මේ වන විටත් අල්ලස් කොමිෂන් සභාව මඟින් ආරම්භ කර තිබේ.
අල්ලස් කොමිසම මෙයට අමතරව හිටපු ඇමැතිවරයාට සහ ඔහුගේ පවුලේ උදවියට අයත් තවත් ස්ථාවර තැන්පතු ගිණුම් 16ක්, රක්ෂණ ඔප්පු 3ක් මේ වන විට අත්හිටුවා තිබේ. ඒවායේ වටිනාකම රුපියල් නව කෝටි හැත්තෑ එක් ලක්ෂයකට අධික (97,125,000) බව අල්ලස් කොමිසම පෙන්වා දෙයි.
එම ගිණුම්වලින් සැකකටයුතු ගනුදෙනු සිදුව ඇති බව පවසා අල්ලස් හෝ දූෂණ කොමිසම පැවැත්වූ මූලික පරීක්ෂණයකින් අනාවරණය වූ පසු අධිකරණයට කළ කරුණු දැක්වීම අනුව මෙම අත්හිටුවීම සිදුව ඇත.
බාල, ප්‍රමිතියෙන් තොර ප්‍රතිදේහ එන්නත් මෙරටට ආනයනය කර රජයේ රෝහල්වලට බෙදාහැරීම මඟින් රුපියල් කෝටි ගණනක වංචාවක් සිදු කිරීම හා රෝගී ජීවිත අනතුරේ හෙළීම, රජයට වංචා කිරීම යන චෝදනාව යටතේ හිටපු ඇමැති කෙහෙළිය ඇතුළු 6 දෙනකුට එරෙහිව නඩු පවරා තිබේ.
