ශ්‍රී ලංකාව අල්ලස, දූෂණය අවම රාජ්‍යයක් බවට පත් කිරීමට සියලු දෙනා එක්විය යුතු බවත් 2024 ජනවරම වංචා දූෂණය පිටුදැකීම වෙනුවෙන් ලබාදුන් ජනවරමක් බව ජනාධිපති අනුර කුමාර දිසානායක මහතා ප්‍රකාශ කළේය.
ජනාධිපතිවරයා මේ බව පැවැසුවේ බණ්ඩාරනායක අනුස්මරණ ජාත්‍යන්තර සම්මන්ත්‍රණ ශාලාවේ පැවැති ජාත්‍යන්තර දූෂණ විරෝධී දින සැමරුමට ඊයේ (09) එක්වෙමිනි.
ජනාධිපතිවරයා තවදුරටත් මෙසේද පැවැසීය.
පසුගිය ජනවරම අපි සෑම දෙනාටම, සමාජයේ අපේක්ෂාව පෙන්නුම් කර තිබෙනවා. විවිධ අවස්ථාවල අපේ රටේ ජනවරම එක එක ආකාරයට ප්‍රකාශයට පත්ව තිබෙනවා. විටෙක යුද්ධය අවසන් වීම හේතුකොටගෙන, ජනවරම ප්‍රකාශයට පත්ව තිබෙනවා. තව විටෙක රටේ ප්‍රජාතන්ත්‍රවාදය සහතික කිරීම වෙනුවෙන් ජනවරමේ ප්‍රධාන ලක්ෂණයක් පිළිබිඹුවෙලා තිබෙනවා. මා හිතන්නේ 2024 වසරේ ජනවරමේ ප්‍රධානතම පංගුව තිබෙන්නේ අල්ලසට සහ දූෂණයට එරෙහි ජනතාවගේ වුවමනාවයි. මෙතැන අල්ලස් හෝ දූෂණ කොමිෂන් සභාවේ නිලධාරීන්, පොලිස් නිලධාරීන්, නීතිපති දෙපාර්තමේන්තුවේ, අධිකරණ සේවාව නියෝජනය කරමින් ඇතුළු ඉතා වැදගත් කේෂ්ත්‍ර ගණනාවක් නියෝජනය කරමින් නිලධාරීන් සිටිනවා. දේශපාලනය නියෝජනය කරමින් මම සිටිනවා.
එතකොට අපි එකිනෙකාට ව්‍යවස්ථාව තුළ බලය පවරා තිබෙනවා. පාර්ලිමේන්තුව විසින් සම්මත කරන ලද නීතිය විසින් අප එකිනෙකාට බලය පවරා තිබෙනවා. ඒ පනත් විසින්, රෙගුලාසි, චක්‍රලේඛ විසින් බලය පවරා තිබෙනවා. අප සෑම දෙනාටම ව්‍යවස්ථාව සහ නීතිය තුළ අප සියලු දෙනාටම බලය පවරා තිබෙනවා. හැබැයි ඒ සියලු බලය උත්පාදනය වී තිබෙන්නේ ජනතාවගේ පරමාධිපත්‍යය කියන බලය තුළින්. එහෙනම් අප බැඳී තිබෙන නීතීන්, අපට පවරා තිබෙන සීමාවන්, මේ සියල්ලටම වඩා ජනතාවගේ ජනවරමට සහ එහි පරමාධිපත්‍ය බලයට අප සියලුම දෙනාට යටත් වෙනවා.
අභිමානවත් ජාතියක ආදර්ශමත් පෙර ගමන්කරුවන් බවට අපි පත් වෙමු. මෙතැන කවුද අඩු, දේශපාලන අධිකාරිය වශයෙන් මා සිටිනවා. ජනාධිපති ලේකම්තුමා, අගමැති ලේකම්තුමා ඇතුළු ඉහළ රාජ්‍ය නිලධාරීන් සිටිනවා. ශ්‍රේෂ්ඨාධිකරණ විනිසුරුවරුන් සිටිනවා. පොලිස්පතිතුමා, ආරක්ෂක අමාත්‍යාංශයේ ලේකම්තුමා සිටිනවා. අල්ලස් හෝ දූෂණ කොමිෂන් සභාව භාරව සිටින සභාපතිතුමා ඇතුළු කොමසාරිස්වරුන් සිටිනවා. එහෙනම් තව කවුද අඩු? එහෙනම් ප්‍රශ්නය තිබෙන්නේ කොතැනද? අපි අවංකවම විමසා බැලුවහොත් ප්‍රශ්නය තිබෙන්නේ මෙතැනමයි.
අපරාධ පරීක්ෂණ දෙපාර්තමේන්තුවේ ෆයිල් එකක් උඩ යන්නෙත් යට යන්නෙත් කොහොමද? වසර 7-8ක් ලිපිගොනු කබඩ් අස්සේ හිරවෙලා තිබෙන්නේ ඇයි? .ප්‍රශ්නය මෙතැන නෙමෙයිද?
මා මේ කියන කරුණු කිසිවක් ඔබ පෞද්ගලිකව ගන්න එපා. අද අපේ සමාජයේ ඛේදවාචකයේ බැරෑරුම්කම. ෆයිල් උඩ යෑම ගැනත්, යට යෑම ගැනත් විමසන්න. අපරාධ පරීක්ෂණ දෙපාර්තමේන්තුව යොමු කරන ලිපි ගොනුවක් වසර 7ක් ඒ පිළිබඳව උද්ධෘතයක් නොදී තිබෙන්නේ කොහොමද? . ප්‍රශ්නය තිබෙන්නේ කොතැනද? අධිකරණය හමුවේ විභාග වන නඩුවක් මාස 7-8ක් කල් යන්නේ කොහොමද? නැවත දිනයක් ලබාගැනීම සඳහා කල් යන්නේ කොහොමද? මේ සෑම දෙනාටම තම ආයතනයේ එවැනි ප්‍රශ්නයක් මතු වීම පිළිබඳව අදහසක්, හේතුවක් කියන්න පුළුවන්. අපරාධ පරීක්ෂණ දෙපාර්තමේන්තුවට කියන්න පුළුවන් මෙතරම් පැමිණිලි සංඛ්‍යාවක් ලැබෙනවා, එනිසා විභාග කොට නිසි පරිදි නඩුවක් පැවරීමට ප්‍රමාණවත් නිලධාරීන් නැහැ කියලා. අල්ලස් කොමිසමටත්, නීතිපති දෙපාර්තමේන්තුවටත් ඒක කියන්න පුළුවන්. ඒ ප්‍රශ්නය තිබෙන්නේ අපෙන් බාහිරව නෙමෙයි.
අපි සෑම කෙනාම අවංකව ප්‍රයත්නයක් දරන්නේ නොමැති නම් ‘ආදර්ශමත් පෙරගමන්කරුවන් අපි වෙමු’ අපිම තමයි ප්‍රශ්නය. ඉතිං මෙතැන නම් ප්‍රශ්නය තිබෙන්නේ පොදු ජනයා එහි වගඋත්තරකරුවන් වන්නේ කෙසේද? මෙතැන නම් ප්‍රශ්නය තිබෙන්නේ, දූෂණය, වංචාව අපි මැඩ පවත්වන්නේ කොහොමද? මා හිතනවා අපි පළමුකොටම අපි අපේ හෘද සාක්ෂියෙන් විමසිය යුතුයි. මා ඔබට එක සහතිකයක් දෙන්නම්. දේශපාලන අධිකාරිය ලෙස, මා වෙත පැවරී තිබෙන බලතල මුළුමණින්මත්, අවංකවත් මේ වංචාව හා දූෂණය මැඬ පැවැත්වීම වෙනුවෙන් යොදවනවා. ඒ පිළිබඳව සැකයක් තියාගන්න එපා.
එහෙත් මා දන්නවා මාගේ සීමාවන්. මට එයට දේශපාලන අධිකාරියේ නායකත්වය ලබාදෙන්න පුළුවන්. අවශ්‍ය වන යටිතල පහසුකම් සම්පාදනය කර දෙන්න පුළුවන්. අවශ්‍ය වන මූල්‍ය ප්‍රතිපාදන වෙන්කර දෙන්න පුළුවන්. හැබැයි කවුරු විසින්ද එය කළ යුතු වන්නේ? මා හිතනවා එය කළ යුතු වන්නේ මෙතන ඉන්න ඔබ විසිනුයි.
අපි දැන් සිටින්නේ එකසිය පහළොස් වැනි තැනයි. මම හිතන්නේ හරිම තොරතුරු නැති නිසා තමයි එතන ඉන්නේ. හරිම තොරතුරු තියෙනවා නම් ඊට වැඩියි. මෑත කාලයේ ලෝකයේ ආන්දෝලනයට තුඩු දුන් පරීක්ෂණ ගණනාවක් දියත් වුණා. එකක් අමෙරිකන් එක්සත් ජනපදයේ සී.අයි.ඒ. නියෝජිතයෙක් වන ඉමාම් සුබේරු මුදල් විශුද්ධිකරණ පනත යටතේ සිර දඬුවම් ලැබුවා. ඒ පර්යේෂණයේදී හෙළිදරව් වෙනවා ඔහුට ශ්‍රී ලංකාවේ මහ බැංකුව ඩොලර් මිලියන හයක් ලබාදී ඇති බවට. එක්සත් ජනපදයේ නඩුවක් විභාගයට ලක්වෙනවා ලංකාවේ මහ බැංකුව සම්බන්ධ වෙනවා.
එංගලන්තයේ මහාධිකරණයේ නඩුවක් විභාගයට ලක් වුණා, එයාර් බස් සමාගම ඒ ඒ රාජ්‍යයන්ට එයාර් බස් මිලදී ගැනීමේදී අල්ලස් දීම පිළිබඳව. එක්සත් ජනපදයත්, ප්‍රංශයත්, එංගලන්තයත් ඒකාබද්ධව මේ පරීක්ෂණය සිදු කළා. ඒ පරීක්ෂණයේදී හෙළිදරව් වෙනවා ශ්‍රී ලංකාවේ එයාර් ලංකා එකටත් එයාර් බස් සමාගම අල්ලස් දී ඇති බවට. එක්සත් ජනපදයේ නඩුවක් විභාග වුණා ශ්‍රී ලංකාවේ තානාපතිවරයා තානාපති නිවසක් මිලදී ගැනීමේ දී මුදල් විශුද්ධිකරණ පනත යටතේ වරදකරු වුණා. ඔහු අධිකරණයෙන් සමාව ඉල්ලුවා.
ඒ වගේම පැන්ඩෝරා විමර්ශන පත්‍රිකා එළියට එනකොට ලංකාවේ කට්ටිය ඒක ඇතුළේ ඉන්නවා. පැනමා විමර්ශන පත්‍රිකා එළියට එනකොට ලංකාවේ අය ඒක ඇතුළේ ඉන්නවා. ඕස්ට්‍රේලියාවේ විමර්ශනයක් දියත් වුණා හම්බන්තොට රෝහලට වෛද්‍ය උපකරණ සැපයීමේදී ඕස්ට්‍රේලියානු සමාගමක් විසින් අල්ලස් දී ඇති බවට. එහේ පරීක්ෂණයක් යනවා. මෙහේ හම්බන්තොට මතු වෙනවා. අපි අපේ රටේ ඇතුළේ ටික පැත්තකින් තියන්න. මෙහෙමනේ අපේ රටට වෙලා තියෙන්නේ. නමුත් අපි බැලුවොත් මේ පිළිබඳ සාධාරණ පරීක්ෂණයක් සිදු වී නියමිත වග උත්තරකරුවන් අධිකරණය හමුවට පමුණුවා අප දඬුවම් ලබාදීමට සමත් වී තිබෙනවාද? අපි හැමදෙනාම මෙරටේ පුරවැසියන් විසින් උත්පාදනය කරන ලද බලය, බලයේ මූලයෙන් අපට බලය ලැබී තිබෙනවා. ඔවුන් එක්රැස් කරන ධනයෙන් මහන්සියෙන් ශ්‍රමයෙන් අපට වැටුප් වරප්‍රසාද ලබාදෙනවා. හැබැයි පෙරළා අපි අපේ රටේ පුරවැසියන්ට යුක්තිය හා සාධාරණත්වය ඉටු කර තිබෙනවාද? නෑ. අපි පෙරළා කරමින් තිබෙන්නේ බොහෝ තැන්වල ඒ ලැබී තිබෙන බලයෙන් නැවත නැවත උපයෝගී කර ගන්නවා දූෂණයේ යෙදෙන්න. ජනතාව විසින් බලය අපට උත්පාදනය කර තිබෙනවා. ජනතාව විසින් අපට වරප්‍රසාද ලබා දී තිබෙනවා. වැටුප් ලබා දී තිබෙනවා. හැබැයි එය ලබාගන්නා අය විසින් කරන්නේ කුමක්ද? තමන්ගේ බලයත් තමන්ගේ වරප්‍රසාදත් උපයෝගී කර ගන්නවා නැවත නැවත අල්ලසේ සහ දූෂණයේ යෙදෙන්න. ඒකනේ යථාර්ථය. එහෙම නෙවෙයිද?
බලය ලබාදෙන්නේ සාධාරණත්වය වෙනුවෙන්. හැබැයි ඒ බලය උපයෝගී කර ගන්නේ අයුක්තිය සඳහායි. පුද්ගලික ප්‍රතිලාභයන් වෙනුවෙන්. ධනය එක්රැස් කිරීම වෙනුවෙන්. එහෙමනම් මේ බලයෙන් ඇති ඵලය කුමක්ද? මම අහන්නේ එච්චරයි. ඒ නිසා අපි හැමදෙනාම තිර අධිෂ්ඨානයකට එන්නේ නැත්නම්, අපිට ලබා දී තිබෙන බලය ජනතාව විසින් උත්පාදනය කර ඇති බලයක්. ඒ බලය තුළ ජනතාවට සාධාරණය සහ යුක්තිය ඉටු කළ යුතුයි කියල සැබෑ අදිටනකට එන්නේ නැත්නම් මොන ආයතන ගොඩ නැඟුවත්, මොන නීති සම්පාදනය කළත් ඵලක් නැහැ. මා කියන්නේ නෑ නීතිය අනවශ්‍ය බව. මා කියන්නේ නෑ ආයතන ශක්තිමත් නොකළ යුතු බව. නීති ප්‍රමාණවත් නැත්නම් තව අපි නීති සම්පාදනය කරමු. ආයතන ප්‍රමාණවත් නැත්නම් තව ආයතන ගොඩ නඟමු. හැබැයි මොන තරම් නීති සම්පාදනය කළත්, මොන තරම් ආයතන ගොඩ නැඟුවත් ප්‍රමාණවත් නෑ, එහි බලය හොබවන අය තමන්ට පැවරී තිබෙන යුතුකම හා වගකීම ඉටු කරන්න සූදානම් නැත්නම්. මගේ කාලයේ නම් මම දැක තිබෙන්නේ බොහෝ අය, අවංකව කියන්නේ බොහෝ අය තමන්ගේ බලය අපහරණයේ යොදවනවා.
තමන්ගේ වගකීම අපහරණය, එහෙම නැත්නම් නීතිපති දෙපාර්තමේන්තුවේ අවුරුදු 07ක් ලිපිගොනුවක් සිරවී තිබෙන්න විදියක් නැහැ. සමහර ලිපි ගොනු ලාච්චුවට දාලා වහපු දවසේ සිට විවෘත කරන්නේ නැතිව ඉන්න විදියක් නැහැ. අපරාධ පරීක්ෂණ දෙපාර්තමේන්තුව ලිපිගොනු, කඩදාසි දිරන තුරු පරීක්ෂණ කරමින් ඉන්න විදියක් නැහැ. එය නීතියේ ප්‍රශ්නයක්. ආයතනයේ ප්‍රශ්නයක් නොවයි. තමන්ට ලැබී තිබෙන බලය තමන් විසින් අපහරණය කිරීම. එය වළක්වා ගැනීමට අසමත් වන තෙක් අපට මේ කාර්යය ජයග්‍රහණය කරන්න බැහැ.
ලිපිගෙනු අවුරුදු 07,08 ලාච්චු අස්සේ සිරවී තිබෙනවා නම් ඇයි එසේ සිදු වන්නේ කියා අප ජනතාවට පැහැදිලි කළ යුතු නැද්ද? ඒ නිසා මේ සමස්ත දේහයම පද්ධතියක් ලෙස කඩාවැටී තිබෙනවා. යළි අපේ රට ගොඩනඟනවා නම් මේ සමස්ත පද්ධතියම ප්‍රතිෂ්ඨාපනයට ලක් කළ යුතුයි. එසේ නොමැතිව කුඩා නීතිමය ප්‍රතිසංස්කරණයකින්, කුඩා ආයතනික ප්‍රතිව්‍යුහගතකරණයකින් පමණක් මේ කාර්යය සම්පූර්ණ කර ගන්න බැහැ. එයට පුළුවන් මගේ අවුරුදු 05ගත කිරීමට පමණයි. නමුත් මෙම ක්‍රමය වෙනස් කරන්න නම් මේ සමස්තය යළි ප්‍රතිෂ්ඨාපනය කළ යුතුයි. එසේ නොමැතිව මෙම ජයග්‍රහණ අත්පත් කරගන්න බැහැ. පෞද්ගලිගව මා ප්‍රයත්න දරනවා මේ සමස්ත පද්ධතියම යළි ප්‍රතිෂ්ඨාපනය කර මේ රාජ්‍යය සුවපත් රාජ්‍යයක් බවට පත් කිරීමට. එයයි මගේ අපේක්ෂාව. මම සිතනවා අපි මේ අවස්ථවේ මෙය කිරීමට අසමත් වුවහොත් අපේ රටේ ජනතාව හීනයකින්වත් සුබ රාජ්‍යයක් පිළිබඳ සිතන්නේ නැහැ.
මෙම 2024 වසරේ ජනවරමේ ජනතාව තැබූ අපේක්ෂාවන් හා බලාපොරොත්තු ඉටුකිරීමට අප අසමත් වන්නේ නම් අපේ ජනතාව හීනෙන්වත් සුබ සිහිනයක් දකින්නේ නැහැ. උතුර, නැඟෙනහිර සිංහල, දෙමළ, මුස්ලිම් බේදයකින් තොරව සියලු ජනතාව එකතැනකට පැමිණ සුබ අරමුණක්, සුබ අපේක්ෂාවක් වෙනුවෙන් බලයක් පිහිටුවා තිබෙනවා. ඒ අරමුණ, ඒ අපේක්ෂාව ඉටු කිරීමට අප අසමත් වුවහොත් මම නැවත නැවත කියනවා ජනතාව නැවත කිසිදින සුබ දවසක් ප්‍රාර්ථනා කරන්නේ නැහැ.
ඒ නිසා එම කාර්යය ඉටු කිරීමට අපට වගකීමක් තිබෙනවා. එම කාර්යය ඉටු කිරීම සඳහා පෞද්ගලිකව මා වෙතත්, අපේ ආණ්ඩුවටත් පැවරී ඇති කාර්යභාරය අපි නිසි පරිදි ඉටු කරනවා. හැබැයි ඔබගේ සහාය අත්‍යාවශ්‍යයි. විමර්ශන සිදු කරන ආයතන, සහාය දක්වන ආයතන, එම විමර්ශනයන් විභාගයට ලක් කොට තීන්දු තීරණ ලබාදෙන ආයතන නිසි පරිදි මීට සක්‍රිය දායකත්වය ලබා නොදෙන්නේ නම් අපට තවත් දශක ගණනාවක් දූෂණ විරෝධී දිනය සමරන්න පුළුවන්. අපි සියලු දෙනාට සැදැහැ සිතින් පැමිණ දූෂණ විරෝධී දිනයේ වාඩි වී ඊට සහභාගි වුණා කියලා අත්පොළසන් දී පිටවී යන්න පුළුවන්. අපි වෙනස් කිරීමට සූදානම් නම් ලබන වසරේ අපට යමක් කළ, මෙය ජයග්‍රහණය කළ හැකි දෙයක් කියා සමරන්න පුළුවන්.
ඔබ සතුව තියෙන පැමිණිලි ප්‍රමාණය මම දන්නවා. ඒ පැමිණිලිවල නම් ගම් දන්නවා. මතක තබාගන්න. ඒ පැමිණිලි දාපු කාල ගැන අපට අදහසක් තිබෙනවා. ඒ පැමිණිලිවල චුදිතයන් කවුද කියල අපට යම් අදහසක් තිබෙනවා. හැබැයි ෆයිල් එක බර වෙනවද
ෆයිල් එක සැහැල්ලු වෙනවද කියල තීරණය කරන්නෙ ෆයිල් එක ඇතුළෙ තියෙන කෙනාගෙ නම නම් මොකක්ද ඇති ඵලේ? අපේ විනිසුරුතුමා කිවුව අඩුම තරමෙ මේ ආර්ථිකයට තීරණාත්මක ලෙස බලපෑමක් කරන ප්‍රධාන ටිකවත් අපි ඉක්මන් කරල කරන්න ඕන.
ඒ කියන්නේ කාටද? නීතිය ක්‍රියාත්මක වෙලා තියෙන්නෙ මකුළු දැලක් වගේ පොඩි සත්තු පැටලෙනවා. ලොකු සත්තු මකුළු දැල බිඳගෙන යනවා. ඉතින් එහෙම නීතියක් තිබෙන බව, එහෙම ක්‍රියාත්මක වෙන බව මේ රටේ පුරවැසියන් දන්නවා. මා දන්නවා මට වඩා නීතිය පිළිබඳ හසල අත්දැකීම් සහිත ඒ ක්ෂේත්‍රයේම වැඩ කරපු, ඒ ක්ෂේත්‍රයේම අත්දැකීම් සහිත අය ඉන්නවා. හැබැයි අපි කවුරුත් දන්නවා නීතිය ක්‍රියාත්මක වෙනවා වගේම නීතිය සාධාරණව ඉටු වෙන බවට ජනතාවගේ විශ්වාසය ගොඩනැඟිය යුතුයි. මම කියන්නේ අද ජනතාව තුළ එහෙම විශ්වාසයක් නෑ. ඒ වගේම යුක්තිය ඉටු කිරීම සඳහා ප්‍රමාද වීම් එක පැත්තකින් යුක්තිය ඉටු කිරීමක් නොවන්නේය. යුක්තිය ඉතා ඉක්මනින් ඉටු කිරීම තමයි යුක්තියට කළ යුතු සාධාරණත්වය. යුක්තිය ඉටු කිරීම ප්‍රමාද වීම යුක්තිය ඉටු කිරීමක් නොවන්නේය කියා අපි විශ්වාස කරනවා.
ඒ නිසා මා විශ්වාස කරනවා අපි අපිම ප්‍රශ්න කරගත යුතු දවස ඇවිත් තිබෙන්නෙ. අපි අපිම අවංකව මේ කාර්යයට මොන තරම් ප්‍රමාණයකින් උර දෙන්න සූදානම්ද නැද්ද යන ප්‍රශ්නයට අපි ඇවිත් තියෙනවා. මම දන්නවා ඔබගේ ආයතන, ඔබගේ කාර්යයන් මේ බිඳ වැටීමට ලක් වුණේ ඔබගේම තනි ස්වකැමැත්තක ප්‍රතිඵලයක් හැටියට මෙතනට පත් වුණා නොවෙයි. ස්වාභාවික ඉරණමක ප්‍රතිඵලයක් නෙවෙයි මේ ආයතන පද්ධතිය මෙතන බිඳ වැටෙන්න. මේ සියලු ආයතන පද්ධතියම මෙතන බිඳ වැටෙන්න ප්‍රධානතම හේතුව අප්‍රසන්න දේශපාලන සංස්කෘතිය.
අපි හිතන්නෙත් නෑ අවුරුද්දෙන් දෙකෙන් මුළුමනින්ම මේක අනික් පැත්තට හරවන්න හැකි වෙයි කියලා. හැබැයි අපි යහපත් ප්‍රයත්නයක් දරනවා. ඊළඟ පරම්පරාව මේ වැඩේ කරන්නෑ. අපේ පරම්පරාව මෙය සාර්ථක කර ගැනීම සඳහා පොර බදපු මිනිස්සු හැටියට මේ වෙනස් කිරීම කර ගැනීම සඳහා පොර බදපු මිනිස්සු හැටියට අපි අපේ කාර්යය අවසන් කිරීමට නියමිතව තිබෙනවා. අපි අපේක්ෂා කරනවා අපේ කාලය ඇතුළේ අවසන් කිරීමට. හැබැයි අපි දෙන්න ඕනෑ මූලාරම්භයක් යහපත් දිශාවට මේක පරිවර්තනය කරන්න. අන්න ඒ මූලාරම්භය දෙන්න දේශපාලන අධිකාරියක් ලෙස අපි ලෑස්තියි.
මෙතන එක්රැස් වී සිටින අපි මේක කරන්නේ නැත්තම්, ඈත දෙහිඅත්තකණ්ඩියේ ජීවත් වෙන ගොවියද මේක කරන්නේ. එහෙම නැත්තම් ගමේ ඉන්න සාමාන්‍ය පුරවැසියද මේ කාර්යය කරන්නෙ. මේ කාර්යය කරන්න තියෙන්නෙ අපිට. අපි මේ කාර්යය කිරීම සඳහා මැදිහත් වෙන්නේ නැත්තම් මේ කාර්යය කිසිවෙක් කරන්නේ නෑ. ඒ නිසා මා හිතනවා ඔබට මේ පැවරී තිබෙන කාර්යභාරය ඉටු කරන්න සිදු වෙනවා. ලබන අවුරුද්දේ දෙසැම්බර් මාසේ 09 වැනිදා අපට වාඩි වී මේ දිනය සමරන්න පුළුවන් වටිනාකමක් එකතු කර ගැනීම සඳහා සියලු දෙනා වැඩ කරමු කියා ඉල්ලා සිටිනවා.
