බලයෙන් පහ කළ සිරියානු ජනාධිපති බෂාර් අල් අසාඩ් ඉස්ලාමීය සන්නද්ධ කණ්ඩායම් සහ සෙසු පාර්ශ්ව සමඟ සාකච්ඡා කිරීමෙන් පසු සිය ධුරය හා රට හැර ගිය බවත්, සාමකාමී බල හුවමාරුවක් සඳහා උපදෙස් ලබා දුන් බවත් රුසියානු විදේශ අමාත්‍යාංශය නිවේදනය කර ඇතැයි විදෙස් මාධ්‍ය වාර්තා කළේය. කෙසේ වුවද එම සාකච්ඡාවට රුසියාව සහභාගි නොවූ බව ද එරට විදේශ අමාත්‍යාංශය වැඩිදුරටත් නිවේදනය කර ඇතැයි වාර්තා වේ. සිරියාවේ පිහිටි රුසියානු හමුදා කඳවුරට මෙතෙක් කිසිදු තර්ජනයක් එල්ල නොවූවද එම කඳවුර සීරුවෙන් තබා ඇතැයි ද වාර්තාවේ. අසාඩ්ගේ රජය බිඳ වැටුණද, එරට විපක්ෂයේ සියලු කණ්ඩායම් සමඟ රුසියාව සමීපව කටයුතු කරන බවත් රුසියානු විදේශ අමාත්‍යාංශය ප්‍රකාශ කර තිබේ. බෂාර් අල් අසාඩ්ගේ සමීපතම මිතුරු රටක් වන රුසියාව මීට පෙර ඔහුට බලයේ රැඳී සිටීමට අවශ්‍ය හමුදා ආධාර ලබා දුන් බව ද වාර්තා වේ.
