සර්බියාවේ නොවැක් ජොකෝවික් එතෙක් මෙතෙක් වැඩිම ග්‍රෑන්ඩ් ස්ලෑම් ටෙනිස් ශුරතා දිනා ගැනීමේ ලෝක වාර්තාව අත්කර ගැනීමේ අපේක්ෂාවෙන් ලබන ජනවාරියේ ඔස්ට්‍රේලියානු විවෘත ටෙනිස් ශුරතාවලියට සහභාගිවීමට නියමිතය. ඔස්ට්‍රේලියානු විවෘත ටෙනිස් ශුරතාවලියට පෙර පැවැත්වෙන බ්‍රිස්බේන් තරගාවලියට ක්‍රීඩා කරන බවට නිවේදනය කිරීමත් සමඟ ඔහු ලෝක වාර්තාව හඹා යන බව තහවුරු වී තිබේ.
මේ වන විට ඔස්ට්‍රේලියාවේ හිටපු ක්‍රීඩිකා මාගරට් කෝට් සමඟ ලොව වැඩිම ග්‍රෑන්ඩ් ස්ලෑම් ටෙනිස් ශූරතා දිනා ගැනීමේ සම වාර්තාවට හිමිකම් කියන 37 හැවිරිදි ජොකෝවික් ඔස්ට්‍රේලියාවේදී එම වාර්තාවේ තනි අයිතිය හිමි කරගනු ඇතැයි දැනටමත් අනාවැකි පළ වී තිබේ. ඔස්ට්‍රේලියානු විවෘත ටෙනිස් ඉතිහාසයේ ශූරතා 10ක්ම දිනා සිටින අතර, එම තරගාවලිය පැවැත්වෙන මෙල්බර්න් ටෙනිස් පිටිය ජොකෝවික්ගේ ප්‍රියතම ක්‍රීඩා පිටියක් බව ද වාර්තා වේ.
බ්‍රිස්බේන් ටෙනිස් තරගාවලිය මේ මස 29 වැනිදා සිට ජනවාරි 5 වැනිදා දක්වා පැවැත්වෙන අතර, ඔස්ට්‍රේලියානු විවෘත ටෙනිස් ශූරතාවලිය ජනවාරි 12 වැනිදා ආරම්භවීමට නියමිතය.
