උතුරේ මහවිරු සැමරුම් පැවැත්වූ බවට සමාජ මාධ්‍ය ඔස්සේ ප්‍රචාරය කර ඇත්තේ පසුගිය වසරවල වෙනත් රටවලදී සිදු කළ උත්සවවල ඡායාරූප බව මහජන ආරක්ෂක සහ පාර්ලිමේන්තු කටයුතු අමාත්‍ය ආනන්ද විජේපාල මහතා පාර්ලිමේන්තුවේදී ඊයේ (04) ප්‍රකාශ කළේය.
පසුගිය වසරවල විදෙස් රටවල පැවති යම් යම් සිද්ධි අන්තර්ජාලයෙන් බාගත කරගෙන එල්.ටී.ටී.ඊ. ත්‍රස්තවාදය සම්බන්ධ ප්‍රචාරක ව්‍යාපෘතියක් දියත් කර ඇත්තේ පරාජිත බංකොලොත් දේශපාලන කණ්ඩායමක් බවත් දැනට ඒ සම්බන්ධයෙන් අත්අඩංගුවට ගත් පුද්ගලයන් 04 දෙනාගෙන් දෙදෙනකු සිලින්ඩරය ලකුණේ දේශපාලන ක්‍රියාකාරිකයන් බවත් මහජන ආරක්ෂක ඇමැතිවරයා පැවසීය.
බොරලැස්ගමුවේදී අත්අඩංගුවට ගත් පුද්ගලයා සිලින්ඩරය ලකුණින් නාමයෝජනා ලැබ මහමැතිවරණයට තරග කළ පුද්ගලයකු බව ද ඔහු හෙළිදරව් කළේය.
අමාත්‍ය ආනන්ද විජේපාල මහතා මේ බව සඳහන් කළේ පාර්ලිමේන්තුවේදී ඊයේ (04) විශේෂ ප්‍රකාශයක් සිදු කරමිනි.
තමන්ගේ දරුවා, මියගිය ඥාතියා සැමරීම සඳහා රටේ ඕනෑම පුරවැසියකුට ඇති අයිතියට ගරු කරමින් උතුරේ මියගිය පුද්ගලයන් සැමරීම සඳහා අවසර ලබා දුන්නත් ඒ හරහා එල්.ටී.ටී.ඊ සංවිධානය ප්‍රවර්ධනය කරන සංකේත, ඡායාරූප යොදා ගැනීම සම්බන්ධයෙන් රජය රටේ නීතිය ක්‍රියාත්මක කළ බව කී මහජන ආරක්ෂක ඇමැතිවරයා මේ පුද්ගලයන් උතුරේ පැවතියේ යැයි පළ කළ වීඩියෝ දර්ශන උතුරු නැඟෙනහිර පළාතේ නොව, රටේවත් සිදු නොවුණු ඒවා බව ද පැවසීය.
එමෙන්ම ගල්ගමුව ප්‍රදේශයේ ඇහැටුවැවදී තමන් සිදුකළ ප්‍රකාශයක් චේතනාන්විතව සාවද්‍ය ලෙස ප්‍රකාශයට පත් කර තිබූ ජාතික පුවත්පතට එරෙහිව අපරාධ පරීක්ෂණ දෙපාර්තමේන්තුවට පැමිණිලි කළ බව කී ඇමැතිවරයා ඒ සම්බන්ධව විමර්ශනයක් ආරම්භ කර ඇති බව ද අනාවරණය කළේය.
මේ අතර උතුරේ එක් පුද්ගලයකු ඉන්නවා. බද්දේගම පදිංචි පුද්ගලයෙක් ඉහත චෝදනා යටතේ නොවැම්බර් 29 වැනිදා අත්අඩංගුවට ගෙන දෙසැම්බර් 17 වැනිදා දක්වා රක්ෂිත බන්ධනාගාරගත කර තිබෙනවා. මීට අමතරව විදෙස් රටවල ඡායාරූප යාපනයේ පැවැත්වූ බවට පෙන්වමින් ජනතාව නොමඟ යැවීමට කටයුතු කළ මරදාන ප්‍රදේශයේ පුද්ගලයකු අත්අඩංගුවට ගෙන මේ වන විට ඇප මත මුදාහැර තිබෙනවා. ඊළඟට බොරලැස්ගමුව ප්‍රදේශයේදී අත්අඩංගුවට ගත් පුද්ගලයා අද දින දක්වා රක්ෂිත බන්ධනාගාරගත කළා. ඔහු දකුණේ සිලින්ඩරයේ ලකුණින් ඡන්දය ඉල්ලූ පුද්ගලයෙක්. ඔවුන් සංවිධානාත්මකව රජය අපහසුතාවට පත්කිරීමේ අරමුණින්, උතුර – දකුණ නැවත ගැටුමකට පසුබිම සකස් කිරීමේ ව්‍යාපාරයක නිරත වී ඇති බවට අපිට හඳුනාගන්න පුළුවන් ඔවුන්ගේ වෛරීය ප්‍රකාශ හරහා. විශේෂයෙන්ම අත්අඩංගුවට ගත් පුද්ගලයන් දෙදෙනකුම සිලින්ඩරේ ලකුණින් ක්‍රියාකාරීන් විදියට ඉන්නවා. මේ ගැන විමර්ශනයක් කළා සමාජ මාධ්‍ය හරහා මේවා වැඩි වශයෙන් ප්‍රචාරය කළේ කවුද කියලා. බොහෝ දේශපාලන කණ්ඩායම් මේවාට සම්බන්ධ බවට තොරතුරු තියෙනවා.”යැයි ද හෙතෙම වැඩිදුරටත් කීවේය.
