පාකිස්තානයට එරෙහිව පැවැත්වීමට නියමිත තරග 3කින් සමන්විත විස්සයි20 තරගාවලියේදී දකුණු අප්‍රිකානු පිලේ නායකත්වයට කඩුලු රකින පිතිකරු හෙන්රිච් ක්ලාසෙන් නම් කර තිබේ. ඔහු විස්සයි20 නායකත්වයට පත් කර ඇත්තේ විස්සයි20 පිලේ නිත්‍ය නායක ඒඩ්න් මාක්‍රම් මේ දිනවල ශ්‍රී ලංකාවට එරෙහිව පැවැත්වෙන ටෙස්ට් තරගමාලාවට එක්වී සිටින බැවිනි.
ශ්‍රී ලංකාවට එරෙහි ටෙස්ට් තරගමාලාව සහ පාකිස්තානයට එරෙහි විස්සයි20 තරගාවලිය අතර විවේකය එක් දිනකට පමණක් සීමා වන බැවින් ටෙස්ට් පිලට ඇතුළත්ව සිටින මාර්කෝ ජැන්සෙන්, කේෂව් මහරාජ්, කගීසෝ රබාඩා සහ ට්‍රිස්ටන් ස්ටබ්ස් ද විස්සයි20 පිලට එක් නොවන බව වාර්තා වේ.
දකුණු අප්‍රිකා – ශ්‍රී ලංකා දෙවැනි හා අවසන් ටෙස්ට් තරගය දින 5ක් දක්වා ඇදී යන්නේ නම් එය නිමාවට පත්වීමට නියමිතව ඇත්තේ දෙසැම්බර් 9 වැනිදා වන අතර, පාකිස්තානයට එරෙහි විස්සයි20 තරගාවලිය ආරම්භවීමට නියමිතව ඇත්තේ දෙසැම්බර් 10 වැනිදාය.
