බංග්ලාදේශ තුන් ඉරියව් ක්‍රිකට් ක්‍රීඩක ශකීබ් අල් හසන් බටහිර ඉන්දීය කොදෙව් කණ්ඩායම සමඟ පැවැත්වීමට නියමිත එක්දින ක්‍රිකට් තරගාවලියට එක් නොකිරීමෙන් ශ්‍රී ලංකාවට පැමිණීමට තීරණය කර තිබේ.
ශ්‍රී ලංකාවේදී පළමු වරට පැවැත්වීමට නියමිත ‘ලංකා ටී10’ තරගාවලියට ක්‍රීඩා කිරීමේ අරමුණින් ශකීබ් මෙලෙස කොදෙව් එක්දින තරගාවලියට එක් නොවීමට තීරණය කර ඇති බව විදෙස් මාධ්‍ය වාර්තා කර තිබේ.
මේ වන විට අබුඩාබියේ පැවැත්වෙන ටී10 තරගාවලියේ බංග්ලා ටයිගර්ස් පිල නියෝජනය කරන ශකීබ් ‘ලංකා ටී10’ තරගාවලියේදී ගෝල් මාර්වල්ස් පිලට ක්‍රීඩා කිරීමට නියමිතය.
අවසන් වරට පැවති බංග්ලාදේශය සහ ඇෆ්ගනිස්තානය අතර එක්දින තරගාවලියටත් ශකීබ් එක් නොවූ අතර, කෙසේ වෙතත් ඉදිරියේදී පැවැත්වීමට නියමිත චැම්පියන්ස් කුසලාන ක්‍රිකට් තරගාවලියේදී යළි බංග්ලාදේශ කණ්ඩායමට එක්වීම ඔහුගේ බලාපොරොත්තුව වී ඇත.
‘ලංකා ටී10’ තරගාවලිය මේ මස 12 වැනිදා සිට 22 වැනිදා දක්වා කණ්ඩායම් 6කගේ සහභාගිත්වයෙන් පල්ලෙකැලේ ජාත්‍යන්තර ක්‍රිකට් ක්‍රීඩාංගණයේදී පැවැත්වීමට නියමිත අතර තරග 3කින් සමන්විත කොදෙව් – බංග්ලාදේශ එක්දින තරගාවලිය ලබන 8 වැනිදා ආරම්භ වීමට නියමිතය.
