මුහුදු කලාප ඇතුළත සිදුවන ත්‍රස්තවාදය සහ සංවිධානාත්මක අපරාධවලට එරෙහිව කලාපීය සහයෝගිතාව වර්ධනය කිරීමේ අරමුණින් පාකිස්තානයේ නාවික හමුදාව විසින් වසර දෙකකට වරක් පවත්වනු ලබන අමාන් නාවික හමුදා අභ්‍යාස ඉලක්ක කරමින් රටවල් තුනකින් වෙරළාරක්ෂක මුර යාත්‍රා ආනයනය කර ඇතැයි විදෙස් මාධ්‍ය වාර්තා කළේය. චීනය, රුමේනියාව සහ තුර්කිය යන රටවලින් ආනයනය කරනු ලැබු එම මුර යාත්‍රා එම හමුදා අභ්‍යාස සඳහා භාවිත කිරීමට නියමිත බව විදෙස් මාධ්‍ය වැඩිදුරටත් වාර්තා කළේය. මීට අමතරව අභ්‍යාසමාලාව ඉලක්ක කරමින් තවත් යාත්‍රා දෙකක් ද පාකිස්තානය තුළ ඉදි කිරීමට පියවර ගෙන ඇති බවත්, රටවල් 50කට වැඩි ප්‍රමාණයක නාවික හමුදා සහභාගිවීමට නියමිත එම අභ්‍යාසමාලාව ලබන වසරේ පෙබරවාරි මස 7 වැනිදා සිට 11 වැනිදා දක්වා පැවැත්වීමට නියමිත බවත් විදෙස් මාධ්‍ය සඳහන් කළේය.
වසර 2007 දී පළමුවරට ආරම්භ කරනු ලැබූ අමාන් නාවික හමුදා අභ්‍යාසමාලාව අරාබි මුහුදේ විවිධ නීතිවිරෝධී කටයුතු, මුහුදු කොල්ලකෑම් වැනි තර්ජන මැඬ පැවැත්වීම සඳහා කලාපයේ රටවල් සමඟ අත්දැකීම් හුවමාරු කරගැනීමට අවශ්‍ය පසුබිම නිර්මාණය කර ඇතැයි ද, අභ්‍යාසමාලාවට සහභාගි වන රටවලට නාවික රාජ්‍යතන්ත්‍රය හරහා විශේෂඥ දැනුම ලබා දීමට හැකියාව ලැබී ඇතැයි ද පාකිස්තාන නාවික හමුදාවේ ප්‍රධානි අද්මිරාල් නවීඩ් අෂ්රෆ් ප්‍රකාශ කළ බව විදෙස් මාධ්‍ය වාර්තා කළේය.
