මෙරට නව අගවිනිසුරුවරයා ලෙස ශ්‍රේෂ්ඨාධිකරණ විනිසුරු මුර්දු ප්‍රනාන්දු මහත්මිය අද (02) දිවුරුම් දීමට නියමිතව තිබෙනවා.
ඒ, ජනාධිපති අනුර කුමාර දිසානායක මහතා ඉදිරියේ යි.
අගවිනිසුරු ජයන්ත ජයසූරිය මහතා විශ්‍රාම යාමත් සමග මුර්දු ප්‍රනාන්දු මහත්මිය මෙම තනතුර සඳහා නම් කරනු ලැබුවා.
1985 වසරේදී නීතිපති දෙපාර්තමේන්තුවට එක්වූ මුර්දු ප්‍රනාන්දු මහත්මිය, 1997 වසරේදී නියෝජ්‍ය සොලිසිටර් ජනරාල් ධුරයටත්, 2014 වසරේදී අතිරේක සොලිසිටර් ජනරාල් ධුරයටත් උසස්වීම් ලබා තිබුණා.
2018 වසරේ මාර්තු මාසයේදී ශ්‍රේෂ්ඨාධිකරණ විනිසුරුවරියක ලෙස පත් වු ඇය 2024 වසරේ ඔක්තෝබර් 10 වනදා වැඩබලන අගවිනිසුරු ධුරයට පත් කළා.
අද දිනයේ සිදු කරනු ලබන දිවුරුම් දීමෙන් අනතුරුව මුර්දු ප්‍රනාන්දු මහත්මිය මෙරට අගවිනිසුරු ධුරයට පත්වූ දෙවන කාන්තාව ලෙස ඉතිහාසයට එක්වනු ඇති.
