ආසියානු යොවුන් කුසලාන ක්‍රිකට් තරගාවලියට ක්‍රීඩා කිරීම සඳහා තමන් සහ කණ්ඩායමේ සෙසු ක්‍රීඩකයන් ද පෞද්ගලිකම මෙන්ම කණ්ඩායමක් ලෙසත් හොඳ සූදානමකින් පසුවන බවත්, මේ තරගාවලියේදී තරගයෙන් තරගය ඉදිරියට යමින් සිය උපරිමය ක්‍රීඩා කරමින් අවසන් මහ තරගය දක්වා යෑම කණ්ඩායමේ බලාපොරොත්තුව බවත් ශ්‍රී ලංකා අවුරුදු 19න් පහළ කණ්ඩායමේ නායක කොළඹ තර්ස්ටන් විදුහල් ක්‍රීඩක විහස් තෙව්මික පැවසීය.
ආසියානු ක්‍රිකට් කවුන්සිලය මෙහෙයවීමෙන් හෙට (29) ආරම්භ වන අවුරුදු 19න් පහළ යොවුන් ආසියානු කුසලාන ක්‍රිකට් තරගාවලියට එක්වීම සඳහා ශ්‍රී ලංකා යොවුන් ක්‍රිකට් කණ්ඩායම ඊයේ එක්සත් අරාබි එමීර් රාජ්‍යය බලා පිටත්ව ගිය අතර, ඉන් පෙර මාධ්‍යට අදහස් දක්වමින් මේ බව කී විහස් මේ තරගාවලිය ඉලක්ක කර හොඳ පුහුණුවක් මෙන්ම හොඳ පුහුණු තරග කිහිපයකට ක්‍රීඩා කළ බවත් කීය.
මේ තරගාවලියේදී කණ්ඩායම් 8ක් කාණ්ඩ දෙකකින් තරග වදින අතර, ‘බී’ කාණ්ඩයෙන් තරගවදින ශ්‍රී ලංකාව මූලික වටයේදී බංග්ලාදේශය, ඇෆ්ගනිස්තානය සහ නේපාලයට එරෙහිව තරගවැදීමට නියමිතය.
ප්‍රතිවාදීන් සම්බන්ධයෙන් අදහස් දක්වමින් ඔහු පැවසුවේ “කිසිදු කණ්ඩායමක් අවතක්සේරුවට ගැනීමට සූදානම් නැහැ. එක කණ්ඩායමක් ඉලක්ක කර නොව තරගයෙන් තරගය අපේ උපරිමය ක්‍රීඩා කරමින් අවසන් තරගය දක්වා යෑම බලාපොරොත්තුව” බවයි.
මේ තරගාවලියට එක්වන කණ්ඩායමට ක්‍රීඩකයන් 15 දෙනකු ඇතුළත් වන අතර, කණ්ඩායමේ උප නායකයා ලෙස සාන්ත බෙනඩික්ට් විදුහලේ ශාරුජන් ශන්මුගනාදන් කටයුතු කරයි.
මේ අතර කණ්ඩායමේ ප්‍රධාන පුහුණුකරු ලෙස හිටපු ක්‍රීඩක ඩිල්රුවන් පෙරේරා මහතා කටයුතු කරන අතර, ඔහු එම තනතුරට පත්වීමෙන් පසු කණ්ඩායම එක්වන පළමු තරගාවලිය මෙයයි.
“මම යොවුන් කණ්ඩායමේ පුහුණුකරු තනතුර භාරගත්තට පස්සේ සහභාගි වන පළමු තරගාවලිය මේක. මට හොඳ විශ්වාසයක් තියෙනවා අපේ කණ්ඩායම ගැන. තරගයෙන් තරගය ජය ගෙන ශූරතාව දක්වා යෑම තමයි අපේ සැලසුම. අත්දැකීම් ඇති ක්‍රීඩකයන් මෙන්ම නවක ක්‍රීඩකයන්ගෙන් ද සමන්විත කණ්ඩායමට මේ තරගාවලියේදී හොඳ තරගයක් දීමට ශක්තිය තියෙනවා” ඩිල්රුවන් පැවසීය.
