මැණික් හා ස්වර්ණාභරණ ක්ෂේත්‍රය තුළ ක්‍රියාත්මක වන විවිධ බදු ක්‍රම නැවත සලකා බලන බව ජාතික මැණික් හා ස්වර්ණාභරණ අධිකාරියේ නව සභාපති නවීන් සූරියආරච්චි මහතා පැවැසීය.
ඒ මහතා මේ බව පැවැසුවේ පසුගියදා (26) සිය ධුරයේ රාජකාරි කටයුතු ආරම්භ කරමිනි.
මරදාන ශාන්ත ජෝසප් විද්‍යාලයේ ආදි ශිෂ්‍යයෙක් වන සූරියආරච්චි මහතා කොළඹ විශ්වවිද්‍යාලයෙන් ව්‍යාපාර පරිපාලනය පිළිබඳව පශ්චාත් උපාධිය ලබා ඇති අතර, අමෙරිකාවේ බෝස්ටන් විශ්වවිද්‍යාලයෙන් 1998දී ආයෝජන බැංකුකරණය පිළිබඳව Humphrey සාමාජිකත්වය (Humphrey Fellowship in Investment Banking) ලබා ඇත.
මූල්‍ය කළමනාකරණය හා ආයෝජන පිළිබඳව පුළුල් හා ගැඹුරු දැනුමක් සහිතව බැංකුකරණයේ වසර 40ක විශිෂ්ට වෘත්තීය අත්දැකීම් ඇති නවීන් මහතා කොමර්ෂල් බැංකුවේ නියෝජ්‍ය සාමාන්‍යාධිකාරී ඇතුළු ඉහළ තනතුරු රැසක් දරා ඇත. සණස සංවර්ධන බැංකුවේ අධ්‍යක්ෂ මණ්ඩල සාමාජිකයකු ලෙස ද කටයුතු කර තිබේ.
විෂය භාර ඇමැති සුනිල් හඳුන්නෙත්ති මහතා සහ අමාත්‍යාංශය සමඟ එක්ව මේ වන විට මැණික් හා ස්වර්ණාභරණ ක්ෂේත්‍රය තුළ ක්‍රියාත්මක වන විවිධ බදු ක්‍රම නැවත සලකා බලා ඉදිරි වසරේදී මැණික් හා ස්වර්ණාභරණ අපනයන ආදායම ඉහළ නැංවීමට බලාපොරොත්තු වන බව නව සභාපතිවරයා මෙහිදී සඳහන් කළේය.
