තරග දෙකකින් සමන්විත ටෙස්ට් තරගාවලිය ආරම්භ කරමින් ඊයේ ඩර්බන් නුවරදී ශ්‍රී ලංකා වේග පන්දු යවන්නන් දකුණු අප්‍රිකානු පිතිකරුවන් දඩයම් කිරීම සාර්ථකව ආරම්භ කළත් වර්ෂාව තරගයට හරස්වීම හේතුවෙන් පළමු දිනය ඕවර 20.4ක සීමා කිරීමට සිදු විය.
පළමු දිනයට තරගය නතර කරන විට පළමු ඉනිම ක්‍රීඩා කරන සත්කාරක දකුණු අප්‍රිකානු පිල කඩුලු 4ක් දැවී ලකුණු 80ක් රැස් කර ගෙන සිටියේය. නායක ටෙම්බා බවුමා ලකුණු 28ක් සහ කයිල් විරෙයින් ලකුණු 9ක් රැස් කරමින් නොදැවී කඩුල්ලේ රැඳී සිටියහ. දෙදෙනා අතර 5 වැනි කඩුල්ලට ගොඩනැඟී තිබූ නොබිඳුණු සබඳතාව ලකුණු 26කි.
ඊයේ දකුණු අප්‍රිකාවේ වේලාවෙන් පෙරවරු 11.25ට පමණ පිටියට වර්ෂාව පතිතවීම හේතුවෙන් තරගය නතර කළ අතර, ඒ සමඟ දිවා විවේකය ගැනීමට ක්‍රීඩකයෝ කටයුතු කළහ. අනතුරුව විටින් විට ඇදහැලුණු වර්ෂාව හේතුවෙන් තරගය යළි ආරම්භ කිරීමට නොහැකි වූ අතර, පස්වරු 3.00ට පමණ පළමු දිනයට තරගය නතර කිරීමට විනිසුරුවෝ තීරණය කළහ.
මේ තරගයේ කාසියේ වාසිය දිනාගත් ශ්‍රී ලංකා නායක ධනංජය ද සිල්වා පළමුව පන්දුවට පහර දීමේ අවස්ථාව සත්කාරකයන්ට ලබා දුන් අතර, ඉනිම ඇරඹූ ඒඩ්න් මාක්‍රම් (9) සහ ටෝනි ඩි සෝර්සිට (4) පිටියේ රැඳී සිටීමට හැකි වූයේ ලකුණු පුවරුව 14ක් වනතුරු පමණි.
අසිත ප්‍රනාන්දු යැවූ ඉනිමේ තෙවැනි ඕවරයෙන් අවසන් පන්දුවෙන් ඇන්ජලෝ මැතිව්ස් උඩ පන්දුවක් රැක ගැනීමෙන් මාක්‍රම් ලකුණු 9කට දැවී ගිය අතර, තවත් පන්දු 2කට පසු සෝර්සි පිටියෙන් ඉවත් කිරීමට විශ්ව ප්‍රනාන්දු සමත් වූයේ කමිඳු මෙන්ඩිස්ගේ විශිෂ්ට උඩ පන්දු රැකීම හමුවේය.
අනතුරුව ක්‍රියාත්මක වූ ළහිරු කුමාර පිට පිට ඕවර 2කදී ට්‍රිස්ටන් ස්ටබ්ස් සහ ඩේවිඩ් බෙඩිංහැම් පිටියෙන් ඉවත් කළේය. ලකුණු 16ක් ලබා සිටි ස්ටබ්ස් දිමුත් කරුණාරත්න උඩ පන්දුවක් රැක ගැනීමෙන් දැවී ගිය අතර, බෙඩිංහැම් ලකුණු 9කට දැවී ගියේ කෙළින්ම පන්දුව කඩුල්ලේ වැදීම හේතුවෙනි.
මේ අතර දකුණු අප්‍රිකානු නායක ටෙම්බා බවුමා ඊයේ දැවී යෑම් දෙකකින් ගැලවීමට වාසනාවන්ත විය. ඔහු එක් ලකුණක් ලබා සිටියදී ඉනිමේ 8 වැනි ඕවරය යැවූ විශ්ව ප්‍රනාන්දුගේ පළමු පන්දුවට දුන් උඩ පන්දුව දිමුත් කරුණාරත්න අතින් ගිලිහී ගිය අතර, ළහිරු කුමාර යැවූ 20 වැනි ඕවරයේ සිවුවැනි පන්දුවට එල්ල කළ පහරින් කුසල් මෙන්ඩිස් උඩ පන්දුවක් රැක ගැනීමට සමත් විය. කෙසේ වෙතත් ලකුණු 20ක් ලබා සිටි බවුමා තවදුරටත් පිටියේ රැඳී සිටීමට වාසනාවන්ත වූයේ එය නිපන්දුවක් බවට පත් වීමෙනි.
මේ තරගයේදී ශ්‍රී ලංකා පිල වෙනුවෙන් ධනංජය ද සිල්වා සමඟ දිමුත් කරුණාරත්න, පැතුම් නිශ්ශංක, දිනේෂ් චන්දිමාල්, ඇන්ජලෝ මැතිව්ස්, කමිඳු මෙන්ඩිස්, කුසල් මෙන්ඩිස්, ප්‍රභාත් ජයසූරිය, අසිත ප්‍රනාන්දු, ළහිරු කුමාර සහ විශ්ව ප්‍රනාන්දු එක්ව සිටිති.
අද තරගයේ දෙවැනි දිනයයි.
