බදුල්ල දිස්ත්‍රික්කය පුරා මේ දිනවල දවස පුරා පවතින වර්ෂාවත් සමඟ මාර්ග කිහිපයක නායයෑම් සක්‍රිය වෙමින් තිබෙන බව දිස්ත්‍රික් ආපදා කළමනාකරණ ඒකකයේ සහකාර අධ්‍යක්ෂ ඊ.එම් උදයකුමාර මහතා පැවසීය. පස්සර, ලුණුගල 13 කණුව ප්‍රදේශය, පස්සර, මඩොල්සිම මාර්ගයේ ඩුමා හන්දිය ආදී ප්‍රදේශවල නිතර නාය යෑම් සිදුවන බවත්, මාර්ග සංවර්ධන අධිකාරිය මාර්ගය පිළිසකර කිරීමේ කටයුතුවල නිරතව සිටින බවත් ආපදා කළමනාකරණ ඒකකය පවසයි.
බදුල්ල – පස්සර, පස්සර – මඩොල්සිම, ඇකිරිය – පිටමාරුව, ඇල්ල -වැල්ලවාය, ඇටම්පිටිය – වැලිමඩ, බෙරගල – හපුතලේ මාර්ග සහ තේ වතු ආශ්‍රිත මාර්ග, දැඩි බෑවුම් සහිත මාර්ග සවස් කාලයේ ඝන මීදුමෙන් වැසී තිබීම නිසා රිය අනතුරු සිදුවීමේ අවදානමක් තිබෙන හෙයින් ප්‍රවේසමෙන් නිසා පරිස්සමින් රිය පදවන ලෙසත් ආපදා කළමනාකරණ ඒකකය රියැදුරන්ගෙන් ඉල්ලා සිටියි.
මේ මාර්ගවලට ඉහළින් ඇති කඳු ප්‍රදේශවලින් නිතර ගල් හා පස්කඳු කඩා වැටී දවස පුරාම මාර්ග අවහිර වෙන අවස්ථාවලදි දිස්ත්‍රික් ලේකම් කාර්යාලයේ ස්ථාපිත කර තිබෙන විශේෂ ආපදා සහන කමිටුවක මූලිකත්වයෙන් මාර්ගය යථා තත්ත්වයට පත් කරමින් පාසල් දරුවන් ඇතුළු මගී ජනතාවට බාධාවකින් තොරව ගමන් බිමන් යෑමට අවස්ථාව සලසා දී තිබේ.
ගමේවල මාර්ගය අවහිර වී ඇති අයුරු
