ශ්‍රී ලාංකික ක්‍රීඩිකාවන් දෙදෙනකු ලෝක බැඩ්මින්ටන් සම්මේලන තරගාවලියක යුගල ශූරතාව දිනාගත් පළමු අවස්ථාව ඉතිහාසයට එක් කරමින් හසාරා විජේරත්න සහ හසිනි අම්බලන්ගොඩගේ බොට්ස්වානා ජාත්‍යන්තර බැඩ්මින්ටන් ශූරතාවලියේ කාන්තා යුගල ශූරතාව දිනා ගැනීමට සමත්වූහ. බොට්ස්වානා හි ඔට්සේ පොලිස් විදුහල් ගෘහස්ථ ජිම්නාස්ටික් ක්‍රීඩා සංකීර්ණයේ පැවැති මේ ශූරතාවලියේ කාන්තා යුගල අවසන් මහා තරගයට සුදුසුකම් ලැබූ හසාරා සහ හසිනි තියුණු තරගයකින් පසු ලකුණු 21-18ක් සහ 22-20ක් ලෙස ලෝක බැඩ්මින්ටන් සම්මේලන කාන්තා යුගල ශ්‍රේණිගත කිරීම්වල 72 වැනි ස්ථානයේ පසුවන දකුණු අප්‍රිකාවේ ඇමී ඒකර්මන් සහ ඩයිඩ්‍රි ලොරේන්ස් පරාජය කරමින් රන් පදක්කම දිනා ගත්හ. මේ ජයග්‍රහණය ඉතිහාසයට එක්වූයේ ජාත්‍යන්තර බැඩ්මින්ටන් තරගාවලියකදී ශ්‍රී ලාංකික ක්‍රීඩිකාවන් දෙදෙනකු විසින් අත්කර ගනු ලැබූ ඉහළම ජයග්‍රහණය ලෙසිනි.
පසුගියදා සැම්බියාවේ පැවැති ජාත්‍යන්තර බැඩ්මින්ටන් ශූරතාවලියේදී ද කාන්තා යුගල රිදී පදක්කම දිනා ගත් හසිනි අම්බලන්ගොඩගේ සහ හසාරා විජේරත්න සිය රන් පදක්කමේ ජයග්‍රහණයෙන් පසු දකුණු අප්‍රිකානු ජාත්‍යන්තර බැඩ්මින්ටන් ශුරතාවලියට සහභාගිවීමට නියමිතය. එම තරගාවලිය මේ මස 28 වැනිදා සිට දෙසැම්බර් මස 1 වැනිදා දක්වා පැවැත්වේ.
